ပါရီ (သို့မဟုတ်) အလင်းမြို့တော် - ၁၁

ပါရီ (သို့မဟုတ်) အလင်းမြို့တော် - ၁၁
နော်တာဒိမ်းဘုရားကျောင်းနောက်ဘက်မြက်ခင်းပြင်တစ်နေရာတွင် ကျွန်တော်တို့ထိုင်ပြီး ဝိုင်းဖွဲ့စကားပြောကြသည်။ ပြောတာတွေကတော့ အစုံအလင်။ အထူးသဖြင့် သူတို့က မြန်မာ ပြည်ပြုပြင်ပြောင်းလဲရေးကို ဆွေးနွေးကြပြီး ကျွန်တော်ကမူ ပြင်ပရှိမြန်မာတို့ အကြောင်း မေးမိသည်။ ကမ္ဘာပေါ်တွင် မြန်မာလူမျိုးများ၏စည်းလုံးမှုအကြောင်းကို သိရှိကြပြီးဖြစ် လိမ့်မည် ဟုယူဆသဖြင့် ကျွန်တော်ရေးမပြလိုတော့ပါ။ အဘက်ဘက်က သူ့အကြောင်း နှင့်သူမှန် နေပါလိမ့်မည်။ ကျွန်တော့် အနေဖြင့် ဘယ်သူမှန်ဘယ်သူမှား ဟူ၍ပြောပိုင်ခွင့် ရှိသူလည်း မဟုတ်ပါ။
'ဒါပေမယ့် ဘယ်သူတွေဘယ်လိုကွဲကွဲ၊ ဘယ်သူ့ကိုမဆို ကူညီနေတဲ့သူတစ် ယောက် တော့ရှိ တယ်။ သူကလည်းခင်ဗျားကိုတွေ့ချင်နေတယ်'ဟု ကိုမစ်ကီ ကပြောသည်။
'ဘယ်သူများတုန်းဗျ'
'ကျွန်တော်တို့ကတော့ သူ့ကိုမြို့စားကြီးလို့ခေါ်တယ်ဗျ။ ပါရီကို ၁၉၇ဝ ပြည့်လွန် လောက် ကတည်းကရောက်လာတာ။ ခင်ဗျား Beyond Rangoon ကို ကြည်ဖူးတယ် မဟုတ်လား။ အဲဒီထဲကမင်းသားကြီးပေါ့'
Beyond Rangoon ၁၉၈၈ အရေးအခင်းအပြီး တပ်ကအာဏာသိမ်းခါစ ရန်ကုန်မြို့တွင်း ပိတ်မိနေသောနိုင်ငံခြားသူတစ်ဦးအား အာဏာပိုင်များပိတ်ဆို့ထားသည့် လမ်းများကြားကလွတ်အောင် မြန်မာလူမျိုးတစ်ဦးက နယ်စပ်ကတစ်ဆင့်ထိုင်းနိုင်ငံသို့ပို့ပေးသည့်ဇာတ်လမ်းဖြစ်သည်။
ထိုရုပ်ရှင်ထွက်လာတော့ အခွေကိုပေါ်ပေါ်ထင်ထင်မကြည့်ရဲ။ လက်ထဲအခွေတွေ့လျှင် ပြဿနာအကြီးအကျယ်တက်ပြီး ထောင်နန်းစံရမည့်ကာလဖြစ်သည်။ ကျွန်တော်နှင့် အဖေအိမ်မှာ အတူတူ ကြည့်ခဲ့ကြခြင်းဖြစ်သည်။ ထိုစဉ်က သူငယ်ချင်းတစ်ဦး၏ အကူအညီဖြင့် အခွေကူးထား သော်လည်း မှိုတက်နေ၍ ကြည့်မရတော့ပေ။ သို့ရာတွင် ယခု ဒီဂျစ်တယ်ခေတ် အစိုးရပြောင်း ပြီးချိန်တွင်တော့ လမ်းဘေးခွေဆိုင်များတွင် ပေါ်ပေါ်တင်တင်ဝယ်ယူနိုင်ပြီဖြစ်သည်။
သူတို့နှင့်စကားကောင်းနေရာက နာရီကြည့်လိုက်တော့ ညခုနစ်နာရီထိုးခါနီးပြီ။ ဟိုတယ်မှ မနက်ဖြန် Check Out လုပ်ရတော့မည်ဆိုတော့ စောစောစီးစီး ပစ္စည်းတွေ ပြန်သိမ်းရဦးမည်။ မနက်ဖြန် ကိုထွေးအခန်းကိုသွားအိပ်မည်။ ဟိုတယ်သို့အပြန် ရထားပေါ်မှာဖုန်းလာသည်။ ဆက်သည့်သူက ဆိုဖီနာမည်အပြည့်အစုံကSophieMalibeaux သူက ဟိုတယ်လာခေါ်မည်။ သူ့အိမ်မှာထမင်းလိုက် စားပါဟုဆိုသည်။ ဆိုဖီက RadioFrance International က အာရှ-ပစိဖိတ် ဗျူရိုအကြီးအကဲ။ မြန်မာပြည်ကို ၂ဝဝ၈ လောက်ကထင်သည်ရောက်ဖူးသည်။ အမျိုးသားဒီမိုကရေစီ အဖွဲ့ချုပ်ရုံးခန်း ကအထွက် ထောက်လှမ်းရေးကဓာတ်ပုံရိုက်ပြီး သတင်းစာထဲတွင်ပင်ပါလာကာ နာမည်ပျက်စာရင်း အသွင်းခံခဲ့ရသည်။ သတင်းစာဆရာကြီး ဟံသာဝတီဦးဝင်းတင် ထောင်ကလွတ်လာတော့ သူ့အတ္ထုပ္ပတ္တိရေးရန် မြန်မာသံရုံးတွင် ဗီဇာလျှောက်သည်မရ။ နောက်ဆုံး သူ့ယောက်ျား မာနူး (Manu) ကိုလွှတ်ကာ သူ့ကိုယ်စားအင်တာဗျူးလုပ်စဉ် အကူအညီပေးရန် ကျွန်တော့်ကို အကူအညီ တောင်းသည်။ ဆရာကြီးဦးဝင်းတင်နှင့် အင်တာဗျူး လုပ်ဖို့နေရာကို ကျွန်တော်စီစဉ်ပေးရသည်။ ထိုအချိန်က ဆရာဦးဝင်းတင်ကို ထောက်လှမ်းရေးက နောက်ကတစ်ကောက် ကောက်လိုက် မှတ်တမ်းတင်နေသဖြင့် အင်တာဗျူး လုပ်ဖို့နေရာရှာရသည်မှာမလွယ်။ ကျွန်တော်နှင့် မာနူးထောက် လှမ်းရေးကို အတော်မျက်ခြည်ဖြတ် ခဲ့ရသည်။ နောက်ကပြင်သစ်ဘာသာဖြင့် Une Vie de Dissident (သဘောကွဲလွဲသူ တစ်ဦးဘဝ) အမည်ဖြင့် စာအုပ်ထွက်ခဲ့သည်။
ဟိုတယ်လော်ဘီမှာ ကျွန်တော်ထိုင်နေစဉ် ဆိုဖီရောက်လာသည်။
'ကဲ၊ မင်းကို တို့ကားအကောင်းစားနဲ့ အိမ်ခေါ်သွားမယ်။ မာနူးကသေသေချာ ချာချက်ပြုတ် ထားတယ်'
ဟုတ်ပါသည်။ ကားကကျွန်တော်ပင်လျှင် မြန်မာပြည်တွင်မမြင်ဖူးပေ။ အထဲက ဂီယာတွေ၊ ဟွန်းတွေက ဟိုးခေတ်ကကားပုံစံ (Deux Cheveux) မြင်းနှစ်ကောင် တံဆိပ်ပြင်သစ် ကားဖြစ်သည်။
'တို့အိမ်က ပါရီနဲ့နည်းနည်းဝေးတယ်ကွ။ မင်းတို့ဆီက ရွှေတောင်ကြား လိုဆိတ်ငြိမ်ရပ် ကွက်ပေါ့ကွာ။ ကားကတော့ ပျက်မှာတွေဘာတွေမပူပါနဲ့။ တို့လင်မယား ပြင်သစ်ကနေ ပါကစ္စတန်ကို ဒီကားနဲ့သွားခဲ့ကြတာပေါ့။ ဘာမှမဖြစ်ဘူး'
အိမ်ရောက်တော့ မာနူးက ရှန်ပိန်ပုလင်းကြီးကို ရေခဲထည့်ထားသည့် ဘူးကြီးတွင်တစ်ပိုင်း စိမ်ထား ပြီးဝိုင်ထည့်ထားသည့်ဖန်ခွက်ကိုကမ်းပေးသည်။
'အိုကေ Pour La Sante (ကျန်းမာရေးအတွက်) ဟု ဆုတောင်းကြပြီး စကားပြောကြသည်။ ဒီ့ပြင်စကားတွေမပြောရပါ။ နက်ဖြန် အမေရိကန် သမ္မတအိုဘားမား မြန်မာနိုင်ငံကိုသွား ရောက် မည်ဖြစ်သဖြင့် ဆိုဖီကသတင်းထောက်ပီသစွာ မြန်မာ့အရေးဆွေးနွေးသည်။ အစိုးရသစ်ကို ဘယ်လိုမြင်သလဲ။ ဒေါ်အောင်ဆန်းစုကြည်ကရော၊ သတင်းစာလွတ်လပ်ခွင့် ပိုမိုပွင့်လင်းလာသလား ... စသဖြင့် တရစပ်မေးပါတော့သည်။
'ဆိုဖီရယ် ... မင်းမလည်း သူ့ခမျာအေးအေးဆေးဆေးနေပါစေ' ဟု မာနူးဝင်ပြောမှ သူ့မေးခွန်းတွေရပ်သွားသည်။ ပြီးတော့မှ ဆိုဖီက မင်းမြန်မာပြည်မပြန်ဘဲ ဒုက္ခသည်အဖြစ်နေချင်ရင် မင်းကိုငါကူညီမယ်ဟုဆိုလာသည်။ ဆိုဖီသည်အရေးပါသော ပြင်သစ်မီဒီယာကြီး၏ အကြီးအ ကဲဖြစ်သဖြင့် သူကူညီလျှင် ဖြစ်နိုင်မည်ကို ကျွန်တော် သိပါသည်။ မြန်မာပြည်က နှစ်ယောက်လောက် ပြင်သစ်တွင် ဒုက္ခသည်အဖြစ် နေထိုင်ခွင့်ရအောင်ကူညီခဲ့သည်ကိုလည်းသိသည်။ သို့သော်လည်း မြန်မာပြည်ကို ကျွန်တော် မစွန့်ခွာချင်သေးပါ။ အခြားသူများက အကြောင်းကြောင်း တွေရှိမည် ဖြစ်သော်လည်း ကျွန်တော်ကမူ စွန့်ခွာစရာအကြောင်းလုံးဝမရှိသေးပါ။ သူ့အကူအညီကို ယဉ်ကျေး စွာပင် ငြင်းပယ်လိုက်ရပါသည်။ ခဏနေတော့ ထမင်းစားရအောင်ဟု မာနူးကဆိုသဖြင့် ထမင်းဝိုင်း ကိုသွားကြသည်။ ဟင်းတွေကတော့ပြင်သစ်အကြိုက် ဘာဂါတ်ပေါင်မုန့်၊ အမဲသားပြုတ်ကြော်၊ စွပ်ပြုတ်ဟင်းချိုတစ်မျိုးနှင့် ဘဲဥပြုတ်မရိုးနိစ်စင်းတို့ ဖြစ်ပါသည်။ ဘဲဥပြုတ်နှင့် မရိုးနိစ်မှာ အီလွန်းလှသဖြင့် အမဲသားပြုတ်ကြော်ကိုစားလိုက်၊ ရှန်ပိန်နှင့်မျှောချလိုက်လုပ်နေရသည်။ အပြန်တွင် ကားမောင်းလိုက်ပို့ပေးသည့် မာနူးက တစ်နေရာဝင်ချင်သော်လည်း ပစ္စည်းသိမ်းရန် ရှိသေးသဖြင့် တောင်းပန်လိုက်ရပါသည်။
တန်ဖိုးနည်းအိမ်ရာတစ်ခုဖြစ်သည့် ကိုထွေးအခန်းကိုရောက်တော့ ဆောက်လုပ်ထားပုံက အပြင်ကမြင်ရတာထက်ပင် ပိုမိုစနစ်တကျရှိလှသည်။ အပြင်မှာ ရာသီဥတု အေးနေသော်လည်း အခန်းထဲတွင်နွေးနေသဖြင့် အပူပေးစက်များတပ်ထားသလားမေးကြည့်မိသေးသည်။
'သူတို့က စဆောက်ကတည်းက ကြမ်းခင်းတို့ နံရံတို့မှာ ရေပိုက်တွေထည့်ထားတယ်။ အဲဒီပိုက်က ရေပူတွေလွှတ်နေတာလေ။ အဲတော့ တစ်ခန်းလုံးနွေးနေတာပေါ့။ အိမ်ရဲ့လက်ဆေးကန်တို့ ရေချိုးခန်းတို့ရောက်မှ ရေဖွင့်ရင် အပူအအေးလိုသလောက်ညှိယူ။ အဲဒါကြောင့်နွေးနေတာပေါ့လေ။ ကျွန်တော်ဒီအခန်းကို ၁ဝ နှစ်အရစ်ကျနဲ့ဝယ်ထားတာ'
အခန်းထဲကရေပိုက်၊ သန့်စင်ခန်းပိုက်ပျက်လည်း ကိုယ့်ဘာသာကိုယ်ပြင်ချင်တိုင်းပြင်၍မရပါ။ သက်ဆိုင်ရာဖုန်းနံပါတ်ကိုဆက်။ အဲဒီကလက်မှတ် ရပိုက်ပြင်ဆရာ (plumber) ကို လွှတ်ပေးသည်။ ကိုယ့်ဘာသာပြင်လို့ သက်ဆိုင်ရာကသိသွားလျှင်ဒဏ်ကြေးပေးရသည်။
(ဆက်ရန်)
(ပုံ) မင်းသားကြီးဦးအောင်ကိုနှင့်ကျွန်တော်

ပါရီ (သို့မဟုတ်) အလင်းမြို့တော် - ၁ဝ

ပါရီ (သို့မဟုတ်) အလင်းမြို့တော် - ၁ဝ
ကိုမစ်ကီ၏အိမ်မှာ ပါရီမြို့တော်ဘက်ဆင်ခြေဖုံးရပ်ကွက်တွင်ရှိသဖြင့် ကျွန်တော်တို့ ရောက် နေသည့်နေရာနှင့် အတော်လှမ်းသော်လည်း ရထားစီးသွားသဖြင့် နာရီဝက်ခန့် သာကြာသည်။ ဘူတာကဆင်းပြီး သူ့အိမ်သို့သွားရာလမ်းမှာ တိုက်ခန်းကွန်ဒိုကြီးတွေမြင်သဖြင့်မေးကြည့်ရာ တန်ဖိုး နည်းအိမ်ရာတွေဟုသိရသည်။ ရန်ကုန်ကကွန်ဒိုဟု ခေါ်ဆိုနေကြသည့် အိမ်တွေ ထက်အများ ကြီးသာပါသည်။ ပြင်သစ်အစိုးရက ငွေကြေးမတတ်နိုင်သော သူများ အတွက်ဆောက်ပေးထားရာ ဒုက္ခသည်နိုင်ငံသားများလည်း လျှောက်ထားဝယ်ယူနိုင်သည်။ ကလေး ရှိလျှင်ဦးစားပေးအဆင့်ဖြစ်၍ အမြန်ရတတ်သည်။ အဆောက်အအုံတွင်နေသူများက အများအားဖြင့် လူမည်းများသာဖြစ်သည်။ အိမ်ရာ အပြင် ကလေးများကစားရန် ကစားကွင်းနှင့်လူကြီးများအတွက် တင်းနစ် ကွင်းနှင့်ဘတ်စ်ကက်ကွင်းကိုပါဆောက်ထားပေးသည်။ ဘတ်စ်ကက်ကစားကွင်းကို ဖြတ်လျှောက် ပြီးနောက် ကိုမစ်ကီအိမ်ခန်းသို့ ရောက်ရှိလာတော့သည်။ အိမ်ခန်းက ၁ဝ ပတ်လည်ခန့်သာရှိပြီး အိပ်ခန်း၊ ဧည့်ခန်း၊ ထမင်းစားခန်း စသည်ဖြင့်သတ်သတ်မှတ်မှတ်မထားရှိပါ။
'ခင်ဗျားသာအိပ်နိုင်မည်ဆိုလျှင် အချိန်မရွေးပဲ၊ အိပ်ခန်းကတော့တွေ့တဲ့အတိုင်းပဲ' ဟု ကိုမစ်ကီက ဘီယာဘူးတွေရေခဲသေတ္တာထဲက ထုတ်ရင်းပြောသည်။ အခန်းထဲတွင် ခေတ်မီလှပ သောအဝတ်ဗီရိုကြီးကိုတွေ့ရာ ယခင်အိမ်ရှင်တွေ မသယ်ချင်၍ အလကားပေးသွားကြောင်းသိရသည်။ မြန်မာပြည်မှာဆိုလျှင် ခုနစ်သိန်းခန့်ရှိမည်ထင်ပါသည်။ ခဏကြာတော့ ကိုစန်းမြင့်နှင့် ကိုဥာဏ်ဝင်းအမျိုးသမီး မဘေဘီပါရောက်လာသည်။ မဘေဘီက အကြော်အလှော်တွေကိုပါ ချိုင့်နှင့်ထည့်လာသည်။ မြန်မာနိုင်ငံရှိအိမ်များတွင် တွေ့ရတတ်သော ခရုများကိုပါကြော်လာသဖြင့် ကျွန်တော် ကမစားရဲဘဲ တုံ့နှေးနှေးရှိနေရာ မဘေဘီက'ဒီကပြင်သစ်တွေက ဒီခရုကို သိပ်ကြိုက်ကြတာ။ သူ့ချည်းသီးသန့်ရောင်းတဲ့ဆိုင်တွေတောင်ရှိတယ်။ နောက်ပြီး မြန်မာပြည်အလွမ်းပြေပေါ့။ ကန်စွန်းရွက် လေးတောင် ကြော်လာသေးတယ်'
'ကန်စွန်းရွက်များ အစ်မရယ် တကူးတကကြော်လာနေသေးတယ်' 'အမယ်လေး၊ ဖိုးလက ဘယ်လိုထင်လို့လဲ၊ ဒီမှာ ကန်စွန်းရွက်တို့ ချဉ်ပေါင်ရွက်တို့က အရမ်းရှားတာ၊ ကြက်သားတစ်ကီလိုကို ၃ ယူရိုပဲပေးရတာ၊ ကန်စွန်းရွက်က ၁ ကီလိုဂရမ်ကို ၁၂ ယူရို မောင်လေးရေ၊ အရမ်းဈေးကြီးတယ်'
အမယ်လေး ဈေးကလေးဆတောင်ကွာနေပါ့လား။ မြန်မာပြည်မှာ လူဖြစ်ရတာ အဲဒါတွေတော့ ကံကောင်းပါသည်။ အသီးအရွက်လတ်လတ်ဆတ်ဆတ်နှင့်ပေါပေါ စားရသည်။ ပြင်သစ်၊ အမေရိကားတို့တွင် အများအားဖြင့် inorganic တွေဖြစ်သည်။ မြန်မာပြည်မှာတော့ အော်ဂဲ နစ်စစ်စစ်တွေရှိနေသေးသည်။ ပါရီတွင် ခရမ်းချဉ်သီး တွေအလုံးလည်းလှ၊ ကြီးလည်းကြီး၊ ဈေးလည်းချိုပါသည်။ ဒါပေမယ့် စားရတာအရသာမရှိ။ ကြက်သွန်နီလည်း ထိုနည်းလည်းကောင်း၊ မြန်မာပြည်က ကြက်သွန်လို အော်ဂဲနစ်ဆိုလျှင် ၄ လုံးကို ၁ ယူရိုလောက်ပေးရသည်။ မြန်မာ ပြည်ကစိုက်ပျိုးထုတ်လုပ်သူတွေကို ဓာတ်မြေသြဇာတို့ ပိုးသတ်ဆေးတို့မသုံးဖို့ အစိုးရနှင့်မီဒီယာက တိုက်တွန်းသတိပေးနိုင်ကကောင်းမည်ထင်သည်။ သူတို့နိုင်ငံမှာတောင် organicfarming တွေပြန်လုပ် နေ ကြပြီ။ အော်ဂဲနစ်အသီးတွေက အလုံးကြီး၊ အမြင်လှသော်လည်း အရသာမရှိ သည့်အပြင် ဘေးထွက်ဆိုးကျိုးအဖြစ် ကင်ဆာရောဂါတွေဘာတွေတောင်ရနိုင်သေးသည်။ မြန်မာနိုင် ငံတွင် သီးနှံတွေကို ရေသေချာမဆေးဘဲစားမိသဖြင့် မူးပြီးတော့ အန်သည့်သတင်းတွေ မီဒီယာတွေမှာ တွေ့မြင်ခဲ့ရသည်။ ထိုသတင်းများဖတ်ပြီးမိတ်ဆွေတစ်ယောက်က
'ကိုယ်ကတော့ ဈေးထဲမှာ ဟင်းသီးဟင်းရွက်တွေဝယ်ရင် သူများတွေလို တုတ်ခိုင်နေတာတွေ၊ ဝင်းဝါစိုပြည်နေတာတွေမဝယ်ဘူး။ ပိုးကိုက်ထားတဲ့ ဟင်းသီးဟင်းရွက်တွေပဲ ရွေးဝယ်တယ်။ အဲဒါတွေက ပိုးသတ်ဆေးမထိထားတာသေချာတယ်' ဟုပြောဖူးသည်။
'ဒီနေ့ညနေတော့ ခင်ဗျားကို နော်တာဒိမ်းဘုရားကျောင်းဘက်လိုက်ပို့မယ်လေ။ အဲဒီမှာထိုင် စားသောက်ကြတာပေါ့'ဟု ကိုဥာဏ်ဝင်းက အဆိုတင်လာသည်။
ပါရီ၏ရာသီဥတုကလည်း အမြဲတမ်း အားကစားအကြိုက်ပင်ဖြစ်နေသည်။ ခန္ဓာကိုယ်တွင်းသို့ အနွေးဓာတ်လေးထည့်ထားမှသာ နေသာထိုင်သာရှိသည်။ ကိုဗစ်ကီတို့ လမ်းထဲကထွက်တော့မှ မျက်နှာချင်းဆိုင်အိမ်လေးတွေကို သတိပြုမိလိုက်သည်။ အိမ်လေးတွေ၏ မျက်နှာစာတစ်ခုလုံးကို ကျွန်တော်အမည်မသိသော တိုက်ကပ်နွယ်ပင်များဖြင့် အလှဆင်ထားသဖြင့် ပြတင်းပေါက်များနှင့် ဝရန်တာကိုသာမြင်ရသည်။ တန် ဖိုးနည်းအိမ်ရာ ဝင်းကိုဖြတ်သန်းလာပြီးနောက် လမ်းတွင်ကနေဒါနိုင်ငံ အလံအမှတ်တံဆိပ်ဖြစ်သည့် မေပယ်ရွက်နှင့်တူသောအရွက်များဝေစည်၍ အပင်များ တသီတတန်းကြီး ပေါက်နေသောလမ်းကို ထပ်မံကူးလိုက်ရသည်။ အပင်များမှ အရွက်များသည် ဆောင်းရာသီဖြစ်သဖြင့် နီးထွေးထွေးဖြင့် အလွန်လှပသည်။ ကျွန်တော်ကတော့ ဘာရယ်မဟုတ်၊ အိမ်အပြန်ယူသွားချင်သဖြင့် ကိုယ်နှင့်မီသည့်အရွက်လေးများကိုခူးနေမိရာ အနီးတွင်ရှိနေသည့် မြူနီစပယ်ဝန်ထမ်းတစ် ဦးဖြစ် ဟန်ရှိသူတစ်ဦးက
'အောက်မှာကြွေကျနေတဲ့ သစ်ရွက်လေးတွေက လည်းလှပါတယ် မွန်စီယာ၊ အပင်ပေါ်ကအရွက်တွေ သူ့ဘာသာသူကြွေကျပါစေ၊ ကြွေဖို့အချိန် မရောက်သေးပါဘူး' ဟု လှမ်းပြောသည်။
မြူနီစပယ်ဝန်ထမ်း၏စကားက သဘာဝပတ်ဝန်းကျင်ကို ချစ်မြတ်နိုးရာရောက်နေသလို အနုပညာလည်းဆန်လှသည်။ ကောက်ယူလာသည့် သစ်ရွက်လေးများကို စာအုပ်တွေမှာ သေချာညှပ်လိုက်ပြီး ဘူတာမှ နော်တာဒိမ်းဘုရားသို့ ရထားစီးလာခဲ့ကြရာ ကျွန်တော်က လမ်းလျှောက်ချင်သဖြင့် တစ်မှတ်တိုင်အလိုတွင် ဆင်းလိုက်သည်။ ဘူတာမှဆင်းပြီး စိန့်မြစ် ဖြတ်လိုက်လျှင် နော်တာဒိမ်းဘုရားရှိသည့် ကျောင်းကြီးကို ရောက်ပေတော့မည်။ စိန့်မြစ် ကိုဖြတ် ထားသည့် တံတားတစ်ခုမှာတော့ သော့ခလောက်တွေ အများကြီး ခတ်ထားတာ တွေ့လိုက်ရသည်။ သည်သော့ခလောက်တွေက ချစ်ခြင်းမေတ္တာကို ကိုယ်စားပြုသဖြင့် ချစ်သူ့ တံတားဟုလည်းခေါ်သည်။ သော့ခလောက်တွေမှာ အမည်ကိုရေးထားပြီး တံတားနံရံဘေးရှိ သံဆန်ခါကွက်တွေတွင် သော့ခတ်ထားကြခြင်းဖြစ်သည်။ ဆိုင်ရာက ထိုတံတားသော့ခလောက်များဖြင့် ဝန်ပိလာပြီဆိုလျှင် အချပ်လိုက် ဖြုတ်ယူသွားပြီး အသစ်ပြန်လဲလှယ် တပ်ဆင်ပေး လေ့ရှိသည်ဟု သိရသည်။
နော်တာဒိမ်းဘုရားကျောင်းကြီးရှေ့ရောက်တော့ ညနေဆောင်းပြီ။ ဘာပုံရှိ၍လဲမသိ။ အရှေ့မျက်နှာစာဘက်တွင် စင်မြင့်ကြီးဆောက်ထားသည်။ အတွင်းထဲတော့ ကျွန်တော် ဝင်မလေ့လာတော့ပါ။ အပြင်ဘက် ဂေါသစ်ဗိသုကာလက်ရာ ကျောက်ဆစ်ရုပ်တွေသွားကြည့်ပြီး ကျောင်းအနောက်ဘက် ပန်းခြံဘက်သို့ လျှောက်လာခဲ့သည်။ ပါရီသည် ခေတ်ဟောင်းနှင့်ခေတ်သစ် လက်ရာရောယှက်နေသည့်မြို့ဟု ကျွန်တော်ယူဆချင်ပါသည်။ ရုပ်ဝတ္ထုတွေ တိုးတက်နေသော်လည်း ပါရီမြို့လယ်နားတွင် အထပ်မြင့်အဆောက်အအုံ တွေကို မြို့မြူနီစီပယ်ကဆောက်ခွင့်မပြုပါ။ ရှေးဟောင်းလက်ရာများကို မပျက်ရန်ထိန်းသိမ်းထားကြသည်။ ပါရီကို ဘာကြောင့် အလင်း မြို့တော်ဟုခေါ်သနည်း။ တစ်ညဥ့် လုံးနေရာအနှံ့တွင် မီးရောင်စုံများ ထိန်ထိန်လင်း နေသော ကြောင့်ပင်လား။ တစ်စိတ်တစ်ပိုင်းသာဖြစ်ပါလိမ့်မည်။ အလင်းမြို့တော် (The Cityt of Light) ဟု ခေါ်ရခြင်းမှာ အလယ်ခေတ် (၁၇ ရာစုစောပိုင်း) က ကမ္ဘာပေါ်ရှိ အတွေးအခေါ်၊ ဒဿနနှင့် ပညာရေးသည် ပါရီတွင်လာရောက်ဆုံစည်းထွန်းကားခဲ့သောကြောင့် ခေါ်သည်ဟု သိခဲ့ရ ပါသည်။

(ဆက်ရန်)

ပါရီ (သို့မဟုတ်) အလင်းမြို့တော် - ၉

ပါရီ (သို့မဟုတ်) အလင်းမြို့တော် - ၉
ဗာဆိုင်းနန်းတော်မှာ ပါရီမြို့ထဲတွင်မရှိပါ။ပါရီ၏အနောက်ဘက် ၁၆ ကီလိုမီတာ (၁ဝ မိုင်ခန့်) အကွာတွင်ရှိပြီး နာရီဝက်ခန့် ကားမောင်းပြီးနောက် ပြင်သစ်နိုင်ငံ၏ သက်ဦးဆံပိုင်ဘုရင်စနစ်နိဂုံးချုပ်ရာ ဗာဆိုင်းနန်းတော်ကြီးကိုရောက်ရှိပေပြီ။ဗာဆိုင်းနန်းတော်ကြီးတစ်ခုလုံးကို ဧည့်သည်များအား ဝင်ရောက်ကြည့်ရှုခွင့်မပေးနိုင်ပါ။လအပိုင်း အခြားအလိုက် မည်သည့်အပိုင်းကိုဖွင့်ထားပြီး မည်သည့်အပိုင်းကို ဘယ်တွင်ဖွင့်မည်စသည်ဖြင့်သာ ဖွင့်ပေးထားပါသည်။အစောင့်ချရသည့် ဝန်ထမ်းအင်အားမနိုင်၍ဖြစ်သည်။အခန်းတိုင်းကို ယခင်ခေတ်က ဘုရင်မိဖုရားများစံမြန်းခဲ့သည့်အတိုင်း စီမံထားသည်ဟုဆိုပါသည်။ နန်းတော်ဥယျာဉ်ထဲတွင် ဓာတ်ပုံရိုက်နေကြရာမှာ ဗြောက်အိုးသံများ ကြားသဖြင့်ငေးကြည့်ရာ ယခုရာသီသည်အမဲလိုက်ရာသီဖြစ်သဖြင့် အမဲလိုက်သူများကပစ်ခတ်နေသည့် သေနတ်သံဖြစ်ကြောင်း ဂျော့ကရှင်းပြသည်။အမှန်တော့ နာမည်ကျော် ဗာဆိုင်းနန်းတော်ကိုကြည့်ရှုရန် အချိန်ပေးသင့်ပါသည်။သို့ရာတွင် ကျန်သူများက လေဆိပ်ဆင်းရတော့မည်ဖြစ်သဖြင့် နန်းတော်သို့ရောက်ဖူးသည်ဆိုရုံမျှသာကြည့်ရှုကြပြီး ပါရီမြို့တွင်းသို့ပြန်လာခဲ့ကြရာ အောင်ပွဲခံမုခ်ဦးအနီး ရှောင်ဇေလီဆေလမ်းမကြီးတစ်လျှောက် ကျွန်တော်နှင့်ဂျော့တို့ဆင်းနေခဲ့ကြပါသည်။
ဂျော့ကဟိုတယ်ပြန်လိုက်ပို့ရမလားဟုမေးသေးသော်လည်းမလိုတော့ပါ။ဂျော့၏တာဝန်မှာ ယခုအချိန်ကစ၍ ပြီးသွားပြီဖြစ်ပါသည်။ကျွန်တော်လည်း ကိုယ့်ဘာသာကိုယ် ပြန်တတ်သည့်အတွက် တစ်ယောက်တည်း မြို့လှည့်လည်ကြည့်ရှုရန် သူနှင့်လမ်းခွဲလိုက်ကြပါသည်။အစီအစဉ်ပြီးပြီးချင်း ကိုဥာဏ်ဝင်းနှင့်ကိုစစ်လီက သူတို့ဆီဖုန်းလှမ်းဆက်ရန် ပြောထားသော်လည်းမဆက်သေးပါ။ တစ်ကိုယ်တော်လျှောက်လည်ချင်သေးသဖြင့် လမ်းဘေးခုံတစ်နေရာတွင်ဝင်ထိုင်လိုက်ပြီး ပါရီမြို့မြေပုံ ကိုလှန်လိုက်သည်။ မနေ့ညက ပါရီမြို့ပေါ်မှာလည်ပတ်ရန် ကောင်းမည့်နေရာတွေကို အင်တာ နက်မှရှာဖွေရေး မှတ်ထားသည့်စာရွက်ကိုလှန်ကြည့်လိုက်သည်။
ကျွန်တော်ရောက်နေသည့်နေရာက အောင်ပွဲခံမုခ်ဦးအနားဖြစ်သည့်အတွက် အဦးဆုံးနေရာ ဖြစ်သော ဒေဇမ်ဘာလီ (L"Hotel Des Invalides) ကိုသွားလည်ရန် ဆုံးဖြတ်လိုက်သည်။ဒေဇမ်ဘာလီကို မသန်စွမ်းဆေးရုံဟုဘာသာပြန်လျှင်ရပါလိမ့်မည်။ဆေးရုံများဘာကြည့်စရာရှိလို့လဲဟုထင်မိကြပါလိမ့်မည်။ထိုဆေးရုံက ရိုးရိုးဆေးရုံမဟုတ်ပါ။ စစ်ပွဲများအတွင်း ဒဏ်ရာရစစ်သားများကိုကုသရန် ဆေးရုံအဖြစ် ၁၈ ရာစုက ပြင်သစ်ဘုရင်လူဝီ ၁၄ က တည်ဆောက်ခဲ့ခြင်းဖြစ်ပြီး ပြင်သစ်ဧကရာဇ်နပိုလီယံ၏ အုတ်ဂူတည်ရှိရာနေရာလည်းဖြစ်သည်။ ဆေးရုံနှင့်ပြတိုက်ပေါင်းဖွင့်ထားခြင်းဖြစ်သည်။
ဝင်းအပြင်ဘက်ကကြည့်လိုက်ကတည်းကအဆောက်အအုံကြီး၏အမိုးခုံးကြီးကထူးခြားနေသည်။ ၁၇ ရာစုအစပိုင်းက ခေတ်စားခဲ့သော ဘာရော့ပုံစံ ( Baroque Style) အမိုးခုံးကြီး (DOME) ဖြစ်သည်။ အတွင်းမှာတော့ဆေးရုံကလှသည်။ယခုထက်ထိတိုင် စစ်သားများနာလန်ထဆေးရုံအဖြစ် အသုံးပြုနေဆဲဖြစ်ပါသည်။ဆေးရုံထဲတော့ ဝင်လျှောက်ခွင့်မရပါ။နပိုလီယံ အုတ်ဂူတည်ရှိရာ ပြတိုက်အဖြစ်ဖွင့်လှစ်ထားသည့် အဆောက်အအုံဘက်ကတော့ ဝင်လည်၍ရသည်။အဆောက် အအုံထဲဝင်ဝင်ချင်း အလည်တည့်တည့်ရှိ အဝိုင်းပုံလှေကားလက် ရမ်းကြီးကိုတွေ့ လိုက်ရသည်။လက်ရန်းကငုံ့ကြည့်လိုက်မည်ဆိုလျှင် နပိုလီယံ၏ အုတ်ဂူကြီးကိုတွေ့ရသည်။ အနီးကပ်ကြည့်လျှင် စကျင်ကျောက်လှေကားကြီးအတိုင်း မြေအောက်ခန်းသို့ဆင်းကြည့်နိုင်သည်။ ဤပြတိုက်မှာ စစ်ချပ်ဝတ်တန်ဆာနှင့် စစ်လက်နက်များကို ပြသထားသည့် ပြတိုက်လည်းဖြစ်သည်။Gaulloir ဟု ခေါ်သည့် ပြင်သစ်လူမျိုးတို့၏ မူလအဖွဲ့အစည်းဖြစ်သော ဂေါလခေတ်မှ စစ်ဝတ်စုံ၊ လက်နက်များမှအစ ဒုတိယကမ္ဘာစစ်အတွင်းက အသုံးပြုခဲ့သော လက်နက်များအထိပြသထားသည်။ ၁၅ ပေခန့်ရှည်မည့်ကြေးအမြောက်ကြီးများပေါ်တွင် ကနုတ်များထွင်းထုထားသည်မှာလည်း အလွန်လက်ရာ မြောက်လှသည်။ ကျွန်တော် လျှောက်ကြည့်နေစဉ်တွင် အသက် ၅ နှစ်ခန့်သာရှိသည့်ကလေး ၅ဝ ခန့်ကို ဆရာ၊ ဆရာမ တစ်အုပ်စုက လိုက်လံ ရှင်းပြနေသည်ကိုမြင်ခဲ့ရသည်။
ဆရာ၊ ဆရာမတွေက ပါးစပ်ကရှင်းပြရုံသာမက မြေပြင်တွင်အဝတ်ဖြူစများခင်းပြီး ရှေးခေတ်က စစ်တိုက်ပုံအတိုင်းသရုပ်ပြနေသေးသဖြင့် ကလေးတွေကလည်း ဆရာ၊ ဆရာမတွေဆီက မျက်လုံးကိုမခွာတော့။အလွန်စိတ်ဝင်စားနေကြသည်။
ပြတိုက်ကထွက်တော့ နေ့လယ်စာစားရန် ကိုဥာဏ်ဝင်းက ဖုန်းဆက်သဖြင့် CONCORDE ဘူတာသို့ ရထားစီးလာခဲ့သည်။ ဘူတာမှာ ကိုဥာဏ်ဝင်းနှင့်ဆုံကာ မြန်မာထမင်းဟင်းနှင့်တူသည့် ကုလားဆိုင်သွားစားမည်ဆိုသဖြင့် အတူလမ်းလျှောက်သွားကြသည်။ စန်းမြစ်ဘေးတစ်လျှောက် စာအုပ်အဟောင်း၊ သတင်းစာအဟောင်းဆိုင်များ၊ ပန်းဆိုင်နှင့်ပန်းချီပို့စ်ကတ်များရောင်းချနေသော ဆိုင်ကလေးများကိုတွေ့ရသည်။တစ်နေရာရောက်တော့ ပန်းချီဆိုင်တစ်ခုကို ဓာတ်ပုံရိုက်ရန် ကင်မရာချိန်လိုက်တော့ လူမည်း ဆိုင်ရှင်ကမရိုက်ရန်လာပြောသည်။ကိုဥာဏ်ဝင်းကလည်း မရိုက်နှင့်ဟုပြော ပိုင်ခွင့်မရှိကြောင်း၊ မရိုက်စေချင်လည်း ဓာတ်ပုံမရိုက်ရဟု စာကပ်ထားရ မည်ဖြစ်ကြောင်း ပြန်ပြောလိုက်သည်။တစ်ယောက်နှင့်တစ်ယောက် အပြန်အလှန်ပြောနေရာမှ လူမည်းဆိုင်ရှင်သည် ကျွန်တော်တို့အနားရောက်လာပြီး အသံကျယ်ကျယ် စိတ်ဆိုးမာန်ဆိုးနှင့် ပြောပါသည်။ကိုဥာဏ်ဝင်း ကလည်း အညံ့မခံပြန်ပြောနေရာ ကျွန်တော့်မှာရန်ဖြစ်မည်ကို ထိတ်လန့်မိသည်။ဖြတ်သွားဖြတ်လာလူတွေကတော့ ကျွန်တော်တို့ကိုရှိသည်ဟုပင်မထင်။ ပုံမှန်အတိုင်း အေးအေးဆေးဆေးသွားလာနေကြသည်။အတန်ကြာတော့မှ ဆိုင်ရှင်ကလျှော့သွားပြီး ရိုက်ခွင့်ပေးသဖြင့် ကျွန်တော်က ကိုဥာဏ်ဝင်းကို ဆွဲခေါ်ထွက်လာရသည်။
" ဒီကောင်တွေကို အဲလိုပြန်မပြောလို့မရဘူးဗျ၊ တစ်ခုခုဆိုမှန်နေရင်ပြန်သာပြောပစ်၊ ဒီကောင်တွေကလည်းနင်းကန်အော်ကြီး ဟစ်ကျယ်ရန်တွေ့လိမ့်မယ်၊ ဒါပေမယ့် သူတို့ဘယ် တော့မှလက်မပါရဲဘူး။ ကိုယ်ထိလက်ရောက်လုပ်တဲ့သူအရှုံးပဲ။ ကိုယ့်ပခုံးအတွန်းခံရရင် တောင် နီးစပ်ရာရဲစခန်း သာသွားတိုင်။ ဒီကောင်လျော်လိုက်ရမည့်ငွေတွေ "ဟုကိုဥာဏ်ဝင်းက လက်ချာပေးသည်။ပြင်သစ်နိုင်ငံ၏ တရားဥပဒေစိုးမိုးရေးကိုပြနေသည့် ပြယုဂ်တစ်ခုအဖြစ် ကျွန်တော် ခံစားလိုက်ရသည်။
အတော်ကြီးလမ်းလျှောက်လာပြီးနောက် ကိုဥာဏ်ဝင်းက ဆိုင်တစ်ဆိုင်ခေါ်သွားသည်။မြန်မာနိုင်ငံဖွားအစ္စလာမ်ဘာသာဝင်များပိုင်သည့် ထမင်းဆိုင်ဖြစ်သဖြင့် မြန်မာ ပါးစပ်နှင့်ခံတွင်း တွေ့လှပါသည်။ဈေးကလည်းမဆိုးလှပါ။ စမူဆာ၊ ထမင်း၊ ပဲဟင်းရည်၊ ဆိတ်သားဟင်း(ပုံစား)နှင့် လက်ဖက်ရည် တစ်ခွက်ကို ၅ ယူရိုပဲကျသဖြင့် ဈေးချိုသည်ဟုပင်ဆိုနိုင်ပါသည်။ကျွန်တော် တို့စားနေသည့်ဆိုင်ရှိရာရပ်ကွက်က ကုလားလူမျိုးတွေနေထိုင်သည့် ရပ်ကွက်ဖြစ်သည်။အထူးသဖြင့် တမီလ်ကုလားတွေဖြစ်ပါသည်။ သီရိလင်္ကာနိုင်ငံတွင် အစိုးရနှင့်တမီလ်ကုလားတို့ စစ်ဖြစ်ပွားနေစဉ်က ထွက်ပြေး လာသောတမီလ်ကုလားများကို ဒုက္ခသည်များအဖြစ်ဖြင့် ပြင်သစ်အစိုးရကနိုင်ငံသားပေးခဲ့ခြင်းဖြစ်သည်။
ထမင်းစားပြီးမကြာပါ။ အနံ့လေးတသင်းသင်းနှင့် ကိုမစ်ကီရောက်လာပါသည်။ ကိုဥာဏ်ဝင်းက ကျွန်တော်တို့ ဤဆိုင်တွင်ရှိနေမည်ဟု ဖုန်းဆက်ထားသဖြင့် ရောက်လာခြင်းဖြစ်သည်။ကိုမစ်ကီထံမှ အနံ့တသင်းသင်းသည်ဆိုးသဖြင့် ဝီစကီသောက်ထားခြင်းမဟုတ်ပါ။ ဝိုင်နီအနံ့ဖြစ်ပါသည်။တစ်နေ့တစ်နေ့ ရေမသောက်၊ ရေဆာလျှင် ဝိုင်နီသာသောက်ဟု သူကိုယ်တိုင်ပင်ကျွန် တော့်ကိုပြောထားပါသည်။ ကိုဥာဏ်ဝင်းနှင့် ကိုစန်းမြင့်တို့နှစ်ဦးမှာ ဒုက္ခသည်အဖြစ် လျှောက်ထားဆဲဖြစ်သဖြင့် အလုပ်မရှိသေးပါ။ကိုမစ်ကီကမူ ပထမအလုပ်ဝင်ပြီးနောက် ထိုအလုပ်မှ ထွက်ကာ အခြားအလုပ်ရှာနေသူဖြစ်သည်။
" ဒီမှာအလုပ်မရှိလည်း အစိုးရကတစ်လကို ယူရို ၉ဝဝ (မြန်မာငွေ ၁ဝ သိန်းခန့်) ထောက်ပံ့ကြေးပေးတာ။ ဘာအခွန်မှလည်းပေးစရာမလိုဘူး။ အလုပ်သမားဝန်ကြီး ဌာနကိုစာတင်၊ အစိုးရကထောက်ပံ့ကြေးပေးတယ်။ ဝန်ကြီးဌာနကရရှိနိုင်မယ့်အလုပ်အကိုင်တွေကို မေးလ်နဲ့တစ် ဆင့်ပို့ပေးတယ်။ မကြိုက်ရင်မလုပ်နဲ့ဦး။ ရတယ်။ အဲခြောက် လကြာရင်တော့ ဝန်ကြီးဌာနက လူကိုယ်တိုင်ခေါ်တွေ့ပြီး ဘာလို့မလုပ်တာလဲမေးတယ်။ အဓိပ္ပာယ်ရှိအောင်၊ အကျိုးအကြောင်း နဲ့တော့ဖြေပေါ့ဗျာ။ အဲဒါဆို နောက်ခြောက်လ ထောက်ပံ့ကြေးပေးတယ်။ ကျွန်တော်ဆိုအဲလိုနေလာတာ ၂ နှစ်ရှိနေပြီ "ဟု ကိုမစ်ကီကရယ်ပြီးပြောသည်။
" ထမင်းစားပြီးပြီဆိုတော့ ခင်ဗျားကျွန်တော့်အိမ်လိုက်ခဲ့ပါလား၊ ဟိုမှာဘီယာသောက်ရင်း စကားလေးဘာလေးပြောတာပေါ့ဗျာ၊ နောက်နေ့ ခင်ဗျားသွားချင်တဲ့နေရာတွေ ကျွန်တော်လိုက် ပို့ပေးပါ့မယ် "ဟု ကိုမစ်ကီ ကဆိုလာပါသည်။ဟုတ်ပါသည်။ ကျွန်တော်လည်း သူတို့နှင့်စကားအေးအေး ဆေးဆေးမပြောရသေးပါ။ ဒီကမြန်မာအဖွဲ့အစည်းတွေ၊ ပုဂ္ဂိုလ်တွေ အကြောင်းသိချင် သေးသဖြင့် လိုက်သွားပါသည်။
(ဆက်ရန်)
ပုံ (၁) L'Hotel des invalides
ပုံ (၂) L'Hotel des invalides အမိုးခုံးက နံရံဆေးရေးပန်းချီ

ပါရီ (သို့မဟုတ်) အလင်းမြို့တော် - ၈

ပါရီ (သို့မဟုတ်) အလင်းမြို့တော် - ၈
ညစာစားဖို့အတွက်ကတော့ ထုံးစံအတိုင်းလွယ်လွယ်ကူကူဖြစ်သည့် မက်ဒေါ်နယ် ဆိုင်ထဲဝင်စားလိုက်ကြသည်။ဆိုင်ကလည်း အလကားပေးနေသလားထင်ရသည်။တန်းစီနေသူ တွေအများကြီး။ အပြန်တွင် ကျွန်တော်အပေါ့သွားချင်လာသဖြင့် အိမ်သာမေးရာ ပြင်သစ်တစ် ယောက်က လမ်းဘေးရှိ အဆောက်အအုံငယ်တစ်ခုကိုညွှန်ပြသည်။အများသုံး အိမ်သာဟုပင်မထင်ရ။ အတော်သန့်ရှင်းသပ်ရပ်သော အခမဲ့အိမ်သာဖြစ်သည်။အဝင်ဝတွင်ခလုတ် ၃ ခုရှိသည်။ အနီခလုတ်မီးလင်းနေပါက လူရှိနေသည့်သဘော။အထဲက လူကိစ္စပြီး၍ အပြင်ပြန်ထွက်လာပါက ချက်ချင်းဝင်၍မရသေး။ဒုတိယမြောက် မီးကအထဲတွင် အလိုအလျောက် သန့်ရှင်းရေးလုပ် နေသည်ဟုဆိုလိုပြီး အစိမ်းရောင်ပြတော့မှ ခလုတ်ကိုနှိပ်လိုက်လျှင် အလိုအလျောက်တံခါးက ဘေးတိုက်ပွင့်သွားသည်။အထဲသို့ရောက်လျှင် 'ပတ်ဝန်းကျင်ထိန်းသိမ်းရေးကို အလေးထားသော အားဖြင့် သင့်ကိစ္စအတွက် လိုအပ်သလောက်ပဲ ရေကိုသုံးပေးပါ'ဟု အဓိပ္ပာယ်ရသော ပြင်သစ်လို စာတန်းတစ်ခုကိုတွေ့ရသည်။
ရေပန်းအားများသောခလုတ်နှင့် အပေါ့သွားလျှင် ဆွဲရသောရေပန်းအားနည်းခလုတ်တို့ရှိရာ ကိုယ့်ကိစ္စအပေါ်မူတည်ပြီး ခလုတ်ရွေးဆွဲရန်ဖြစ်သည်။ ကျွန်တော်အပေါ့သွားပြီး၍ ရေပန်းအားနည်း သောခလုတ်ကိုဆွဲလိုက်တော့ 'သဘာဝပတ်ဝန်းကျင်ကို အလေးထားတဲ့လူကြီးမင်းရဲ့အပြုအမူကို ကျေးဇူးတင်ပါတယ်' ဟု အလိုအလျောက်ပြန်ကြားစက်မှ အသံထွက်လာသည်။ ပါရီတွင် ယခုလိုအခမဲ့အိမ်သာတွေကို လူစည်ကားသည့်နေရာမျိုးများတွင် ချထားပေးလေ့ရှိသည်။အိမ်သာတွင်းမှာ ကျွန်တော်တို့နိုင်ငံမှာလို လက်စွမ်းပြထားသည့် ညစ်ညမ်းစာတွေ၊ ပုံတွေတစ်ခုမျှမရှိ။နောက်လူစည်ကားသည့်နေရာများတွင် ထားပေးထားသောအရာများမှာ စက်ဘီးနှင့်မော်တော်ကားတွေဖြစ်သည်။ အဲဒါတွေကတော့ အခမဲ့မဟုတ်၊ နာရီအလိုက်ပေးရသည်။ လမ်းဘေးပလက်ဖောင်းများတွင် စက်ဘီးထည့်သည့်တိုင်လေးတွေ ထောင်ထားပြီး စက်ဘီးယူလိုသူက ဘေးရှိစက်တွင် Credit ကတ်ကို စကင်ဖတ်လိုက်လျှင် စက်ဘီးဖြုတ်ယူ၍ရသည်။မိမိသွားသည့် နေရာရှိ စက်ဘီးအပ်ခုံများတွင် ပြန်ထိုးထည့်လိုက်လျှင် အလိုလိုသော့ကျသွားသည်။မော်တော်ကားတွေလည်းထိုနည်းလည်းကောင်း၊ နာရီပိုင်းနှင့် အငှားယူမောင်း၍ရသည်။ပတ်ဝန်းကျင် ထိန်းသိမ်းသည့်အနေဖြင့် လောင်စာဆီကိုလုံးဝမသုံးဘဲ လျှပ်စစ်နှင့်မောင်းသည့် ကားတွေဖြစ်သည်။မြန်မာပြည်က တရုတ်နိုင်ငံလုပ် QQ3 ကားလေးများနှင့်တူသည့်ကားလေးများကို လမ်းဘေးဓာတ် တိုင်များ အနီးတွင် ပလပ်ကြိုးလေးများတပ်လျက်တွေ့နိုင်ပါသည်။ ပါရီရောက်သူတွေမှန်သမျှ သွားရေးလာရေးအဆင်ပြေအောင် စီမံထားပုံမှာ အင်မတန်စနစ်ကျလှ ပါသည်။ပါရီမြို့ရှိ မြို့နယ်အုပ်ချုပ်ရေးမှူးများအားလုံးသည် ကိုယ့်ရပ်ကွက်၊ ကိုယ့်မြို့နယ်နေလူထုအတွက် အလုပ်လုပ်ကြသည်ဟု ကိုမစ်ကီကပြောဖူး သည်။လွန်ခဲ့သည့် ၂ နှစ်ကဆိုလျှင် မြို့နယ်တစ်ခုရှိ အုပ်ချုပ်ရေးမှူးကိုယ်တိုင် သူ့မြို့နယ်အတွက်ချပေးသည့် ဘတ်ဂျက်ငွေနည်းသဖြင့် မြို့တော်ခန်းမရှေ့တွင်ဆန္ဒပြဖူးသည်ဟုဆိုသည်။
ဟိုတယ်သို့ရောက်၍မဝင်သေးဘဲ ဆေးလိပ်ခဏသောက်နေစဉ် လက်ကိုင်ဖုန်းကမြည်လာရာ ကျွန်တော့်သူငယ်ချင်းဖြစ်သူ Pierre (ဖြဲ) ထံမှဖြစ်နေသည်။ သူကမြန်မာနိုင်ငံကို အလွန်နှစ်သက်သူ။ ၂ဝဝ၇ ရွှေဝါရောင်သံဃာ့အရေးအပြီး သတင်းလာယူစဉ်က ကျွန်တော်နှင့်ခင်မင်ရင်းနှီးသွားသူဖြစ်ပြီး ယခင်ကလည်း မြန်မာနိုင်ငံကို ၇ ခေါက်ရောက်ဖူး သူဖြစ်သည်။ ကျွန်တော်ဟိုတယ် ပြန်ရောက် ပြီဆိုသည်နှင့် သူချက်ချင်းလာမည်။ စောင့်နေပါဆို၍ ဟိုတယ်မှာပင်စောင့်နေလိုက်သည်။ မိနစ် ၂ဝ ခန့်ကြာပြီး သူရောက်လာရာတွေ့တွေ့ချင်းပင်
" မင်းပါရီကို ဘယ်လိုထင်လဲ၊ နေရတာ ပျော်လား"
" ပျော်တယ်၊ အရမ်းလှတာပဲ၊ ငါ ထင်ထားတာထက်တောင်လှနေသေးတယ်၊ ပြင်သစ် လူမျိုးတွေ ကလည်းခင်စရာပါ၊ သဘောကောင်းတယ် "
" မြန်မာလူမျိုးတွေ သဘောကောင်းတာတော့မမီပါဘူးကွာ၊ ငါကမ္ဘာပတ်ပြီး သတင်းထောက် လုပ်နေသူပါ။ တကယ်ပါ။မင်းတို့မြန်မာနိုင်ငံရောက်တော့ အဲဒီကလူတွေရဲ့ အပြုံးနဲ့ဖော်ရွေမှုက အသက်ဝင်တယ်၊ ဟန်လုပ်တာမဟုတ်ဘူး။အခွင့်အရေးများရမယ်ဆိုလို့ကတော့ မြန်မာပြည်မှာ ပဲလာနေချင်တယ် "
ညစာစားပြီးပြီဆိုသော်လည်း သူကသူ့အိမ်ပြချင်သေးသည်ဟုဆိုပြီး ဆိုင်ကယ်နှင့်ခေါ်သွားသဖြင့်လိုက်သွားရပြန်သည်။ ပါရီကလမ်းလေးတွေသည် ကျဉ်းကျဉ်းလေးတွေဖြစ် သော်လည်း ကားပိတ်ခြင်း၊ ဟွန်းတီးကျော်တက်ခြင်းတို့ကို ကျွန်တော်တစ်ခါမှမမြင်ခဲ့ရပါ။ ကားနှင့်ဆိုင်ကယ်ဆိုလျှင် ဆိုင်ကယ်၊ ဆိုင်ကယ်နှင့်လူဆိုလျှင်လူ စသည်ဖြင့် ဦးစားပေးမောင်းနှင်လေ့ရှိကြသည်။
ငါးမိနစ်ခန့် ဆိုင်ကယ်စီးပြီးနောက် သူ့အိမ်ကိုရောက်လာသည်။ သူ့အိမ်က ခရိုင်အမှတ် ၇ တွင်ရှိပြီး အစိုးရအရာရှိတွေနေသူများသည့် ရပ်ကွက်ဖြစ်သည့်အတွက် ဈေးအတော်ကြီးလှသည်ဟု သူကဆိုသည်။ သူတို့ဆီမှာအခန်းတွေတည်ဆောက်ပုံက ရန်ကုန်ကအခန်းတွေနှင့်မတူပါ။ ယခင်ပိုင်ရှင်တစ်ဦးတည်း ဖြစ်ခဲ့ဟန်တူသော ဝင်းကြီးထဲတွင် တိုက်များဆောက်ထားခြင်းဖြစ်သည်။ပင်မသစ်သားတံခါးဝပေါက်ဘေးတွင် တံခါးဖွင့်ရသောနံပါတ်များကိုနှိပ်မှ တံခါးမကြီးပွင့်မည်ဖြစ်သည်။ သူ့အခန်းမှာ မြေညီထပ်နှင့် ပထမထပ်ဖြစ်သည်။အောက်ဘက်တွင်မူ ၁ဝ ပေ ပတ်လည်ခန့်ရှိသည့် ခြံဝင်းလေးကို စားပွဲ၊ ကုလားထိုင်၊ ပန်းချီကား စသည်တို့ဖြင့် အလှဆင်ထားသည့် အိမ်ပထမထပ်သို့ တက်သည့် လှေကားဘေးတွင် စာအုပ်များ၊ စီဒီခွေများနှင့် အရှေ့တိုင်းမှ အနုပညာ လက်ရာများဖြင့် အလှဆင်ထားသည်။ ပြင်သစ်လူမျိုးများသည် အိမ်တွင်းအလှဆင်သည့် အနုပညာကို အလွန် မြတ်နိုးဟန်ရှိပါသည်။ ကျွန်တော်ရောက်ဖူးသည့်တိုက်ခန်းတိုင်းလိုလို ထိုသို့အလှဆင်ထား သည်ကိုမြင်ခဲ့ရသည်။
" မင်းကတော့ ငါတိုက်ခန်းဝယ်နိုင်တော့ အတော်ချမ်းသာတယ်ထင်မှာ၊ ဘဏ်ကချေးပြီး ဝယ်ထားတာကွ၊ တစ်သက်လုံးဆပ်ရမှာ၊ ငါ့လခက တစ်လယူရိုလေးထောင်ရတယ်။ ဒါပေမယ့် တိုက်ခန်းဖိုးအရစ်ကျသွင်းရတာ၊ အခွန်ဆောင်ရတာ၊ ကျန်းမာရေးအာမခံပေးရတာ၊ စားသောက်တာ တွေနဲ့ လကုန်ရင် ယူရို ၂ဝဝ လောက်ပဲကျန်တော့တာ "ဟု Pierre ကရယ်ကျဲကျဲဖြင့်ပြောသည်။
ပါရီမှာ (မြို့တွင်း) အခန်းတစ်ခန်း ပိုင်ဆိုင်ဖို့မလွယ်လှပါ။ အတော်များများက ပေ ၂ဝ ပတ်လည် ခန့်ရှိသောအခန်းကို တစ်လလျှင် ယူရို ၁၅ဝဝ ခန့်ဖြင့် ငှားနေကြခြင်းဖြစ်သည်။
" ဆေဗရင်း (သူ့မိန်းမ) က သန်ဘက်ခါဆို ဂျော်ဒန်သွားမှာ၊ ပြီးရင် ငါလည်းလိုက်သွားရမှာ၊ မင်းဒီမှာကြိုက်သလောက်နေ၊ စားစရာတွေလည်း ရေခဲသေတ္တာထဲမှာ ဝယ်ပေးထားတယ်၊ မင်းပြန်တော့မှ ဘေးအခန်းကိုသော့အပ်ခဲ့ "ဟု ရေခဲသေတ္တာကိုဖွင့်ပြရင်းပြောပြသည်။ သူဂျော်ဒန်မသွား မီ ပါရီ၏နာမည်ကြီး မီးနီရပ်ကွက်ဖြစ်သည့် Quatier Pigalle ကို လိုက်ပြမည်ဟုဆိုသည်။ လိုက်ပို့ချင်သည့် သူ့စိတ်ကိုကျွန်တော်သံသယမရှိပါ။ သို့ရာတွင် သူကမိန်းမကြောက်သူဖြစ်သဖြင့် ကျွန်တော့်ကို ခုတုံးလုပ်ပြီး သွားချင်နေသူ လည်းဖြစ်လေသည်။
နောက်နေ့နံနက်မှာတော့ လေယာဉ်ကွင်းပို့မည့်ကားရောက်လာသည်။ ပြင်သစ်နိုင်ငံ၏ သက်ဦးဆံပိုင် ဘုရင်စနစ်ချုပ်ငြိမ်းရာ ဗာဆိုင်းနန်းတော်သို့ သွားကြတော့မည်ဖြစ်သည်။
(ဆက်ရန်)
ပုံ(၁) ပါရီမှာယူစီး၍ရသော လျှပ်စစ်ကားများ(တိုင်တွင်လျှပ်စစ်ပြန်ဖြည့်ပေးရသည်)
ပုံ(၂) ပါရီက လမ်းဘေးရွေ့လျားအိမ်သာ

ပါရီ (သို့မဟုတ်) အလင်းမြို့တော် - ၇

ပါရီ (သို့မဟုတ်) အလင်းမြို့တော် - ၇
တွေ့စရာ နှစ်နေရာလောက်ပဲရှိတော့ပြီး မိမိတို့ အစီအစဉ်ဖြင့် ဈေးဝယ်ရန် ဂျော့ကကြို ပြောထားသည်။သန်ဘက်ခါဆိုလျှင် ကျွန်တော်ကလွဲပြီး ကျန်အဖွဲ့များမြန်မာပြည်ပြန်တော့မည်။ဈေးကြီးလှ၍အပို ပစ္စည်းများမဝယ်နိုင်သည့်တိုင် နာမည်ကြီးလှသောပြင်သစ်ရေမွှေးတစ်ပုလင်း
လောက်ကိုတော့ ဝယ်သွားမည်ဟုဆုံးဖြတ်လိုက်ပါသည်။မဆုံးဖြတ်လျှင်လည်း
မြန်မာပြည်ပြန်ရောက်လျှင် အိမ်သူကမျက်နှာတော်ငြိုပြီး တဖျစ်တောက်တောက် လုပ်မည်မလွဲပါ။ဟိုတယ်တွင် နံနက်စာစားပြီးသည်နှင့်ဦးဆုံးလုပ်ရသည့်အလုပ် မှာဟိုတယ်တွင်နက်ဖြန်နှင့်သန်ဘက်ခါ ကျွန်တော့် အတွက် အခန်းယူထား မထားမေးရန်ဖြစ်ပါသည်။ ဂျုလဒ်ကကမူ ကျန်နေခဲ့မယ့်ခုနစ်ရက်တွင် နှစ်ရက်ကို ဟိုတယ်တွင်တည်းခိုရန်ပေးချေထား မည်ပြောထားသောကြောင့်သေချာအောင်မေးရခြင်းဖြစ်ပါသည်။
" ဘွန်ဂျူးး မွန်စီယာ၊ ဘာများအကူအညီပေးရပါ့မလဲ "ဟု ကိုယ်ခန္ဓာတောင့်တောင့်ဖြောင့်ဖြောင့်နှင့် ဧည့်ကြိုဌာနမှ မိန်းကလေးကမေးပါသည်။
" ဘွန်ဂျူး မက်မွိုင်ဇယ်၊ ကျွန်တော့်အတွက် မနက်ဖြန်နဲ့သန်ဘက်ခါအတွက် အခန်းယူထား သလားသိချင်လို့ပါ "
အခန်းရကြောင်းသေချာမှ ပါရီတွင်နေထိုင်သော သူငယ်ချင်း ကိုထွေးအား ဟိုတယ်တွင်နှစ်ရက်နေပြီးလျှင် သူ့အိမ်တွင်လာနေမည်ဟု ဖုန်းဆက်လိုက် သည်။ရောက်စကတည်းက အုံ့မှိုင်းနေသောပါရီသည် ဒီနေ့တော့ရှားရှား ပါးပါးနေခြည်တို့ဖြာကျနေသည်။နေခြည်ဖျန်းပက်ထားသော်လည်း လေကမူအေးနေသဖြင့် နေရထိုင်ရသက် သောင့်သက်သာရှိလှပါသည်။ ကျွန်တော်တို့ဒီနေ့ R.S.F ဟုခေါ်သည့် နယ်စည်းမခြားသတင်းထောက်များ အသင်းကိုရောက်တော့ ကျွန်တော်တို့ကို အာရှ-ပစိဖိတ်ဗျူရို အကြီးအကဲဖြစ်သူ ဘင်ဂျမန်အစ္စမေးလ်က ကြိုဆိုနေသည်။ သူနှင့်ကျွန်တော်မစိမ်းလှပါ။ သူက မြန်မာနိုင်ငံကို ၂ဝ၁၂ ကရောက်ဖူးသည်။ သူတို့အဖွဲ့က မြန်မာနိုင်ငံ ကိုလာချင်သော်လည်း ယခင်ကဗီဇာမရ၊ အစိုးရအသစ်ပြောင်းတော့မှ ဒါရိုက်တာဖြစ်သူ ခရစ္စတိုဖာနှင့်အတူ မြန်မာနိုင်ငံရောက်ဖူးခြင်းဖြစ်သည်။ သူမြန်မာပြည်ကပြန်ခါနီး ကျွန်တော့်ကို တော်တော်ဦးနှောက်စား သွားသေးသည်။ ထိုအချိန်က ရခိုင်ပြည်နယ်တွင်မငြိမ်မသက်မှုများရှိနေသည့် အတွက် သူကသွားလေ့လာချင်သည်။ ကျွန်တော်က ထိုနယ်တွင် ပုဒ်မ ၁၄၄ ထုတ်ထားကြောင်း၊ နိုင်ငံခြားသားများ သွားမရကြောင်းပြောပါသေးသည်။ သူကမရ၊ နောက်နေ့ချက်ချင်း လေယာဉ်ကွင်းမှာ Go Show (ချက်ချင်း လက်မှတ်ဝယ်) ပြီးသွားမည်ဆို တော့ ကျွန်တော်လက်လျှော့လိုက်သည်။ ကျွန်တော်ကမူ သူ့အတွက်စိတ်ပူနေသည်။သူ၏ရုပ်သွင်က အိန္ဒိယ တိုင်းရင်းသား နှင့်တူနေသည်ကိုး။ သူ၏အဘိုးနှင့်အဘွားက အိန္ဒိယနွယ်ဖွား၊ သူကမူ ပြင်သစ်နိုင်ငံတွင် မွေးဖွားသူဖြစ်သည်။ ထိုနေ့နေ့ခင်း ရောက်တော့ သူကျွန်တော့်ကိုဖုန်းပြန်ဆက်သည်။ သူသွားခွင့်မရပါတဲ့။ လူဝင်မှုကြီးကြပ်ရေး ကသူ့ဗီဇာသက်တမ်း နှစ်ရက်သာကျန်တော့သဖြင့် ပေးမသွားဟုဆိုသဖြင့် ကျွန်တော့်ရင်ထဲက အလုံးကြီးကျသွားပါသည်။သွားခွင့်ရလျှင်ဘာတွေ ဘယ်လို ဖြစ်ဦးမည်မသိ။
ရုံးခန်းထဲရောက်တော့ ဒါရိုက်တာဖြစ်သူ ခရစ္စတိုဖာက ဆီးနှုတ်ဆက်သည်။ ကျွန်တော် ပါရီကိုလာနိုင်တာ ဝမ်းသာမဆုံး။ ညစာစားဖို့ ချိန်းနေသေးသော်လည်း ကျွန်တော်တို့မှာ အစီအစဉ်တွေပြည့်နေပြီ။ နယ်စည်းမခြားသတင်းထောက်များအကြောင်း အနည်းငယ်ရှင်းပြချင်ပါ သေးသည်။ အမှန်စင်စစ် နယ်စည်း မခြားသတင်းထောက်များအသင်းသည် သတင်းဖြန့်ချိ သည့် ဌာနမဟုတ်ပါ။ သတင်းအေဂျင်စီမဟုတ်ပါ။ AFP ၊A P ၊ Reuter စသည်တို့သည် သတင်းအေဂျင် စီကြီးများဖြစ်ကြပြီး ဝက်ဘ်ဆိုက်တွေကိုယ်စီရှိသော်လည်း သူတို့ကသတင်းလွှင့်ခြင်းမဟုတ်၊ သူတို့က သတင်းထောက်တွေ ကမ္ဘာအနှံ့ထားပြီး သတင်းလွှင့်ဌာနတွေဖြစ်သည့် BBC ၊ CNN ၊ ABC စသည့် ကမ္ဘာကျော်သတင်းဌာနများကို ဓာတ်ပုံ၊ ဗီဒီယို၊ သတင်းစာသားများ ရောင်းချသည့်အေဂျင်စီဖြစ်သည်။ နယ်စည်းမခြားသတင်းထောက်များအသင်းမှာမူ အေဂျင်စီသတင်းလွှင့်ဌာနမဟုတ်ဘဲ သတင်းသမားများ သတင်းယူခွင့်နှင့်သတင်းလွတ်လပ်ခွင့်ကို စောင့်ကြည့်သည့် အစိုးရမဟုတ်သည့် အဖွဲ့အစည်းတစ်ခု (NGO) သာဖြစ်ပါသည်။
ကမ္ဘာအနှံ့ရှိ ထောင်သွင်းအကျဉ်းကျခံနေရသော သတင်းသမားများ၊ ပြန်ပေးဆွဲခံရသော သတင်းသမားများ လွတ်လပ်ခွင့်ပြန်လည်ရရှိရန် တောင်းဆိုခြင်း၊ သို့တည်းမဟုတ် အဆိုပါသတင်းသမားများအပေါ် ကျန်းမာရေး၊ မိသားစုစားဝတ်နေရေး၊ ပညာရေး စသည့်လိုအပ်သောကဏ္ဍများကို ထောက်ပံ့ပေးနေသည့် အဖွဲ့အစည်းဖြစ်သည်။
RSF မှပြန်လာတော့ ကျွန်တော်တို့တွင် တွေ့ဆုံရမည့် အစီအစဉ်တွေမရှိတော့သဖြင့် ဂျော့က ရိုဒင် ပြတိုက်ဆီသို့ခေါ်သွားပါသည်။ နာမည်ကျော်ပန်းပု ဆရာရိုဒင်၏ 'တွေးခေါ်သူ' (Thinker) ရုပ်တုကို ကိုယ်တိုင်မြင်ရတော့မည်ဖြစ်သဖြင့် အားလုံးဝမ်းသာနေကြသည်။ ပြတိုက်ဝင်းထဲ ဝင်လိုက်သည်နှင့် လှပစွာပုံဖော်ထားသော အပင်များကြား(Thinker) ရုပ်တုကို ထင်ထင်ရှား ရှားမြင် နေရပါသည်။ ကြေးဖြင့်ထုလုပ်ထားသော် အရုပ်ကြီးသည် မိုးရေထဲတွင်ပါသည့် အက်ဆစ်နှင့် ဓာတ်ပြုထားသောကြောင့်လားမသိ အစိမ်းရောင်ပေါက်နေသည်ဟု ကျွန်တော်ထင်ပါသည်။ ပန်းပုပညာရှင် သြဂတ်စ်ရိုဒင် (Auguste Rodin) သည် Hotel Biron ကို သူ၏အလုပ်ခန်းအဖြစ် ၁၉ဝ၈ ခုနှစ်ကတည်းက အသုံးပြုခဲ့ပြီးနောက်ပိုင်းတွင် ပြတိုက်အဖြစ် ပြောင်းလဲဖွင့်လှစ်ပါမည်ဟူသော သဘောတူညီချက်ဖြင့် အဆောက်အအုံနှင့်တကွ သူ၏လက်ရာများ အားလုံးအပါအဝင် သူစုဆောင်းထား သော ပန်းချီကျော် ဗန်ဂိုး၊ ရေးနွားတို့၏ ပန်းချီကားများကိုပါ ပြင်သစ်အစိုးရသို့လှူဒါန်းခဲ့သည်။ ပြတိုက်ထဲတွင်တော့ မီးစလိုက်များဖြင့် ချိန်ထိုးပြသ ထားသော ကြေးရုပ်နှင့်စကျင်ကျောက်သားရုပ်များ။ ရိုဒင်၏နာမည်ကျော်လက်ရာများဖြစ်သည့် အနမ်း (THE KISS) နှင့် အသူရာ ဘုံတံခါးများ (GATES OF HELL) စသည်တို့ကိုလည်း ကြည့်ရှုခဲ့ရသည်။ အခြားပြတိုက် များလိုပင် စပိန်၊ ဂျာမန်၊ အင်္ဂလိပ်၊ ပေါ်တူဂီ စသည့်ဘာသာများ ဖြင့်ရှင်းပြပေးနေသော နားကြပ်များကိုလည်း ပြတိုက်အဝင်ကတည်းက တောင်းယူနိုင်သည်။ မိမိသိရှိနားလည်လိုသော ပန်းပုရုပ်နံပါတ်ကို နှိပ်လိုက်လျှင် ထိုရုပ်တုသမိုင်းကြောင်းအဓိပ္ပာယ်ကို ရှင်းပြပေးနေသည်။
" ကဲ မြန်မြန်ကြည့်ကြ၊ ဈေးဝယ်ကြဦးမယ်မဟုတ်လား။
ကဲ ဂျော့ရေ၊ ဈေးတော့တို့ဘာသာတို့ပဲသွားလိုက်တော့မယ်။ ခင်ဗျားပြန်ချင်ပြန်တော့နော်။ မနက်ဖြန် သူတို့က နေ့လယ်တစ်နာရီ လေယာဉ်နဲ့ပြန်မှာ။ အဲဒါဘယ်လိုစီစဉ်မလဲ "ဟု ကျွန်တော်က ဂျော့ကိုမေးလိုက်သည်။
" အင်း နေ့လယ်တစ်နာရီဆိုတော့ မနက်ပိုင်းတစ်ခုလုံးအားနေတာပဲ။ ဒီတော့ မနက် ၆ နာရီခွဲလောက် ငါမင်းတို့ဟိုတယ်ကိုလာခေါ်မယ်။ ဗာဆိုင်းနန်းတော်ကို သွားကြည့်ကြတာပေါ့။ သူတို့အိတ်တွေပါ တစ်ခါတည်းကားထဲထည့်ပြီး ဗာဆိုင်းသွားကြမယ်။ ပြီးရင် သူတို့ကို ကားနဲ့ လေဆိပ်ကိုတိုက်ရိုက်ပို့ပြီး ငါနဲ့မင်းကတော့ မင်းဟိုတယ်နဲ့နီးရာမှာ ဆင်းနေခဲ့ကြတာပေါ့ "
ဂျော့ပြန်သွားပြီးနောက် ဈေးဝယ်ရန်ကောင်းသော ဂျော့ပွန်ပီဒူးပြတိုက်ရှိရာသို့ ပါးစပ်ပါရွာရောက် ထုံးမူ၍ ရောက်လာခဲ့ကြသည်။ ပိုက်လုံးကြီးများ ဆက်ထားသလို ဗိသုကာဟန်ပြတိုက်ကြီးရှေ့တွင်တော့ ဇီဒန်းနှင့်မက်ဒရာစီ ၂၀၀၆ ကမ္ဘာ့ဖလားဘောလုံးပွဲတုန်းက ဘောလုံးလုနေကြပုံအရုပ်ကြီးကို တွေ့ရသည်။ ဂျော့ပွန်ပီဒူးပြတိုက်မှာ အဓိကအားဖြင့် မော်ဒန်လက်ရာများပြသထား သည့်ပြတိုက်ကြီးဖြစ်သည်။ ဈေးဝယ်ရန်ရှိသဖြင့် ဝင်မကြည့်ကြတော့သော်လည်း မှန်ပြတင်းမှတစ်ဆင့် ပါဖောင်းမန့်လုပ်ပြထားသော ကား ၂ စီးကို တွေ့နေရသည်။ ကားတွေက ကြေမွတွန့်လိမ် နေသော ကားများ။
ကျွန်တော်က " အဲဒါမင်းသမီးဒိုင်ယာနာကားပေါ့၊ ပြင်သစ်နဲ့ အင်္ဂလန်ဆက်သွယ်ဖောက်ထားတဲ့ ရေအောက်ကားလမ်းမှာတိုက်ခဲ့တာပေါ့ "ကျွန်တော်က နောက်လိုက်တာဖြစ်သော်လည်း မလှလှ ဌေးကမူ-
" ဟင်ဟုတ်လား။ အင်းလေ ဒီလောက်အရှိန် ပြင်းပြင်းနဲ့တိုက်မှတော့သေတာပေါ့ "ဟု စိတ်မကောင်းဟန်ဖြင့်ပြောသည်။
ဈေးမှာ ရန်ကုန်ကညဈေးတန်းတွေနှင့်တော်တော်တူပါသည်။ ဆိုင်ခန်းများ၏ရှေ့လမ်းပေါ်တွင် အဝတ်အစား၊ အထည်စ၊ နာရီ၊ ပန်းချီကား စသည့် ပစ္စည်းတွေနေရာချထားပြီး ဝယ်သူကို ပြင်သစ်ဘာသာဖြင့် ခေါ်နေကြသည်။ မလှလှဌေးက ဖိနပ်တစ်ရန်ဝယ်ချင်သဖြင့် ပြင်သစ်လို အနည်းငယ်တတ်သော ကျွန်တော့်ကို သူနှင့်အတူလိုက်ပေးရန်ခေါ်သည်။ ဆိုင်ထဲရောက်တော့ မလှလှဌေးကြိုက်သည့်ဖိနပ်က ယူရို ၈ဝ ကျော်ကျနေသည်။ ကျွန်တော်ကခပ်တည်တည်ပင် ယူရို ၄ဝ ဆစ်ချလိုက်ရာ နောက်ဆုံး ၄၅ ယူရိုနှင့်ဈေးတည့် သွားသည်။ ဆိုင်မှထွက်ပြီး ခပ်လှမ်းလှမ်းရောက်မှ ကင်မရာမေ့ကျန်ခဲ့ကြောင်းပြောသဖြင့် တစ်ခေါက်ပြန်လှည့်ရသေးသည်။ ဆိုင်ရောက်တော့ ကင်မရာကျန်ခဲ့မှန်းဆိုင်ရှင်ကမသိ။ ဖိနပ်အစမ်းဝတ်သည့်နေရာကျမှ ကင်မရာကို အသင့်ပြန် တွေ့ရသဖြင့်တော်ပါသေးသည်။ ဆိုင်ရှင်တရုတ်မက ကျွန်တော်တို့ကို ပစ္စည်းတွေမမေ့ကျန်ဖို့၊ ခါးပိုက်နှိုက်တွေ လည်းပေါကြောင်း တဖွဖွသတိပေးလိုက်သေးသည်။ ပါရီမှာ ခါးပိုက်နှိုက်တွေမထင်ရ။ ကျောင်းသား၊ ကျောင်းသူလေးတွေလို လူကြီးလူကောင်းတွေလို ဝတ်ကောင်းစားလှ တွေနှင့်ဖြစ်သည်။ ခါးပိုက်နှိုက်ဟုထင်ရသည့် ဘူတာထဲတွင်အိပ်သည့် ခြေသလုံးအိမ်တိုင်သမားများကတော့ အရက်ဖိုးပိုက်ဆံတောင်း ချင်တောင်းမည်။ ဘယ်တော့မှခါးပိုက် နှိုက်မလုပ်။ ကျောပိုးအိတ် ပိုးထားပြီးရထားစီးလျှင် မိမိအနားကောင်မလေးတွေကပ်ပြီး ပြီတီတီလုပ်နေလို့ကတော့ မျောမနေနှင့်။ မျောလို့ကတော့ပါသွားပြီသာမှတ်လိုက်ပေရော့။ ။
(ဆက်ရန်)
ပုံ(၁) ပါရီရှောင်ဇေလီဇေလမ်းမကြီး
ပုံ(၂) ရိုဒင်ပြတိုက်

ပါရီ (သို့မဟုတ်) အလင်းမြို့တော် - ၆

ပါရီ (သို့မဟုတ်) အလင်းမြို့တော် - ၆
ပါရီကိုရောက်တာ ၅ ရက်ပဲရှိသေးသော်လည်း ကျွန်တော်တို့က မြန်မာအစား အစာကိုလွမ်းလှပြီ။ အထူးသဖြင့် ရန်ကုန်နံနက်စောစော ထမင်းကြော် သို့မဟုတ် မုန့်ဟင်းခါး စားနေကျသူများဖြစ်ရာ ဟိုတယ်ကနံနက်စာကျွေးသည့် ဘာဂက် (bagutte) ခေါ် ပေါင်မုန့်ညို၊ croissant ခေါ် မုန့်ကြိုးလိမ်၊ ဘဲဥပြုတ်၊ အသားပြားကြော်တို့ကိုငြီးငွေ့လှပြီ။ ပြင်သစ်တွေကတော့ဘာဂက်ခေါ် ပေါင်မုန့်ညို ရှည် ရှည်ကြီးတွေကို မြန်မာတွေမုန့်ဟင်းခါး ကြိုက်သလို ကြိုက်ကြသည်။ပြင်သစ်ပြည်၏ အမှတ်အသား များမှာ အီဖယ်မျှော်စင်၊ အောင်ပွဲခံမုခ်ဦး (L'Arch de Triomphe) တို့အပြင် ဝိုင်၊ croissant၊ ဘားဂတ်၊ ကဖေးနှင့်ရေမွှေးတို့သည်လည်း ပြင်သစ်သင်္ကေတ များဖြစ်ကြသည်။ခရီးသွားစဉ် နံနက်စောစော အစာများများစားလေ့ မရှိဘဲ ဖျော်ရည်ကိုသာသောက်လေ့ရှိသည့် ကျွန်တော့်အတွက် ဟိုတယ်တွင် ဖျော်ရည် (Juice) တွေရှိသဖြင့်တော်ပါသေးသည်။ဒီနေ့သွားရမည့်အစီအစဉ်ကို ကြည့်လိုက်တော့ ဦးဆုံး Le Figaro အမည်ရှိ နေ့စဉ်ထုတ်သတင်းစာတိုက်ဆီဖြစ်သည်။တွေ့ဆုံရမည့်သူက Alain Burluet ။ကျွန်တော်ကြားဖူးသည့် နာမည်လိုလို ရှိသော်လည်း မသေချာသေးပါ။သတင်းစာတိုက် ရောက်၍သူ့မြင်တော့မှ ကျွန်တော်သိသောသူဖြစ်နေသည်။ အစပထမသူကလည်းမမှတ်မိသေး။ နောက်မှအံ့သြစွာဖြင့် ကျွန်တော့်နာမည်ခေါ် ပါသည်။သူက ၂ဝ၁၂ ကြားဖြတ်ရွေးကောက်ပွဲတုန်းက မြန်မာနိုင်ငံတွင် သတင်းယူစဉ် ကျွန်တော်နှင့်အတူ အလုပ်လုပ်ခဲ့သူဖြစ်သည်။ သံတမန်နှင့် နိုင်ငံရေးရာသတင်းထောက် ဖြစ်ပြီး ရာထူးကြီးဖြစ်သည်။Le Figaro မှာ နေ့စဉ်ထုတ်သတင်းစာဖြစ်ပြီး ၁၈၂၆ ခုနှစ်ကတည်းက ထုတ်ဝေ ခဲ့ခြင်းဖြစ်ကာ ပြင်သစ်နိုင်ငံ၏သက်တမ်းအရှည်ကြာဆုံး သတင်းစာ ဖြစ်သည်။
“ Le Figaro မှာ သတင်းထောက်ပေါင်း ၃ဝဝ လောက်ရှိပြီး နိုင်ငံခြားမှာ သတင်းထောက် ၁ဝ ယောက် ရှိပါတယ်။ ဒီမှာ ပုံနှိပ် (Print) ပိုင်းနဲ့ ဝက်ဘ်ဆိုက်ပိုင်းဆိုပြီး ခွဲထားပါတယ်။ ဝက်ဘ်ကတော့ သတင်း အတိုချုပ်တွေပေါ့လေ။ ပုံနှိပ်ကတော့ စုံစမ်းထောက်လှမ်းရေးထားတဲ့ သတင်းတွေ (investigative reports) ၊ အသေးစိတ် (indept) ရေးထားတာတွေဖော်ပြပါတယ်။ ဝက်ဘ်ဆိုက်က တော့အခမဲ့ပါ။ ဒါပေမယ့် ရေရှည်မှာ ပုံနှိပ်မီဒီယာရဲ့အခန်းကဏ္ဍက ပိုအကျပ်အတည်း တွေ့နိုင်တဲ့ အတွက် အခပေး ဝက်ဘ်ဆိုက်ဖြစ်အောင်လုပ်ဖို့စဉ်းစားနေပါတယ် “ ဟု အာလန်ကဆိုသည်။
သတင်းစာအား စီးပွားရေးလုပ်ငန်းရှင်များက လွှမ်းမိုးမှုရှိမရှိနှင့်ပတ်သက်၍
“ လွှမ်းမိုးသူကတော့ရှိ တယ်။ ကျွန်တော်တို့တိုက်ကို Le Figaro ဆိုတဲ့ အုပ်စုကပိုင်တာပါ။ သတင်းစာအပြင် TV မဂ္ဂဇင်းလည်း ထုတ်ဝေပါတယ်။ လက်ရှိသတင်းစာတိုက်ရဲ့ ဥက္ကဋ္ဌက Serge Dassaut အ ဖြစ်မယ့်အတွက် အရင်သမ္မတဆာကိုဇီပါတီရဲ့လမ်းစဉ်ဖြစ်တဲ့ လက်ယာဘက်ကိုယိမ်း ပါတယ်။ စွက်ဖက်မှုတွေရှိပေမယ့်ညှိပြီးလုပ်ရတာပေါ့ဗျာ “
ဒါးဆိုး (Dassaut) ဆိုသူမှာ ပါလီမန်အမတ်တစ်ဦးဖြစ်ပြီး တိုက်လေယာဉ်နှင့်ပုဂ္ဂလိကပိုင် လေယာဉ် များ ထုတ်လုပ်သည့် DASSAUT ကုမ္ပဏီ၏ အကြီးအကဲလည်းဖြစ်သည်။ သတင်းစာတိုက်မှ ပြန်ထွက် လာပြီးနေ့လယ်စာစားပြီးနောက် Le Canard Enchaine သတင်းစာတိုက်သို့လာခဲ့ကြ သည်။ သတင်းစာ၏အမည်မှာ သံခြေချင်းဝတ်ဘဲကလေးဟု အဓိပ္ပာယ်ရပြီး အထိန်းအကွပ်နှင့်သတိထား ရသောသတင်းစာဟု ရည်ညွှန်းချင်သည်ဟုထင်ရပါသည်။ သတင်းစာ၏အချက်အလက်ကို အခြေခံပြီး သရော်စာဆန်ဆန်ရေးသော စာများဖြစ်သည်။ စာမျက်နှာရှစ်မျက်နှာသာရှိပြီး ဓာတ်ပုံတွေလည်း လုံးဝမသုံး၊ ကယ်ရီကေးချားခေါ်ရုပ်ပြောင်ပုံနှင့်ကာတွန်းများကိုသာ အသုံးပြု ထားသည်။
သတင်းစာတိုက် တည်ရှိရာ စိန့်ဟော်နိုရေး (St Honore) လမ်းရှိ ပထမထပ် အခန်းထဲသို့ ဝင်လိုက်သည်နှင့် ပြင်သစ်သမ္မတဟောင်း ချားလ်ဒီလ်ဂေါ၏ ရုပ်ပြောင်ပုံကိုစက္ကူဖြင့် ရုပ်လုံးကြွ ပလာစတာကိုင်ထားသည်ကိုမြင်ရသည်။ ကျွန်တော်တို့ကို လက်ခံတွေ့ဆုံသူမှာ သတင်းထောက် ဖြစ်သူ Ms. Brigitte ဖြစ်သည်။အသက် ၅ဝ ကျော်ခန့် ထောင်ထောင်မောင်း မောင်းဖြစ်ပြီး စကားကို သွက်လက်ရွှင်ပျစွာပြောတတ်သူဖြစ်သည်။
“ ပြင်သစ်မှာ ကျွန်မတို့ သတင်းစာလို သရော်စာရေးတဲ့သတင်းစာ နောက်တစ်စောင် ရှိသေးတယ်။ Charlie Hebdo တဲ့။ သရော်စာအရေး ကောင်းလို့ မကြာသေးခင်က အကြမ်းဖက်သမားတစ်စုက မီးဝင်ရှိုလိုက်ကြတယ်။တရားခံတော့မမိသေးဘူး။ ဒါပေမယ့် အဲဒီသတင်းစာကို ဆက်ထုတ်နေတုန်းပဲ “
Le Canard Enchaine သည် အပတ်စဉ် ဗုဒ္ဓဟူးနေ့ထုတ်သတင်းစာဖြစ်ပြီး ၁၉၁၅ ခုနှစ်ကစတင် ထုတ်ဝေခဲ့သည်။မကြာမီနှစ်တစ်ရာပြည့်တော့မည်ဖြစ်သည်။
“ ဒီလိုဖိအားတွေရှိပေမယ့် ကျွန်မတို့မတုန်လှုပ်ပါဘူး။ ကျွန်မတို့က အစိုးရအဖွဲ့တွေအကြောင်းရေးလို့ ပြဿနာလည်း အကြိမ်ကြိမ်တက်ဖူးပြီး အစိုးရဌာနဆိုင်ရာက တရားစွဲတာချည်းပဲ အကြိမ်တစ်ရာ လောက်ရှိပြီထင်တယ်။ ဒါပေမယ့် ၄၊ ၅ ခါပဲ အစိုးရကနိုင်တယ်။ ကျွန်မတို့က အချက်အလက်နဲ့ရေး တာကိုး။ သူတို့ငြင်းလို့ဘယ်ရမလဲ။လက်ဝဲယိမ်းတာလက်ယာယိမ်းတာထက် လူတွေခံစားနေ ရတာကို အချက်အလက်နဲ့ရေးတာလေ။ ရယ်စရာပြောရဦးမယ်။ အရင်သမ္မတ ဆာကိုဇီလက်ထက်ကဆိုရင် သမ္မတကို ဗုဒ္ဓဟူးနေ့တိုင်း ကျွန်မတို့သတင်းစာနဲ့ သမ္မရုံးကလူတွေသွားရမည့်အလှည့်ကို မဲနဲ့ရွေး တာရှင့်။ မပေးရဲလို့လေ။သမ္မတကလည်း ကျွန်မတို့ကိုမျက်မုန်းကျိုးပေမယ့် သတင်းစာကိုဖတ်တော့ ဖတ်ရတယ်လေ “
သူ့စကားကြားတော့ တကယ့်သတင်းစာသမားကောင်းတစ်ယောက်ဆိုတာ ဒီလိုပါလားဟု လေးစားအထင်ကြီးမိသည်။ သတင်းစာကို ပုံမှန်ယူသူတစ်သောင်းခွဲရှိပြီး အပတ်စဉ် ၅ သိန်းရိုက်နှိပ် ရကာ တစ်စောင်လျှင် ၁.၂ဝ ယူရိုနှင့်ရောင်းခြင်းဖြစ်သည်။သတင်းစာက ကြော်ငြာ လည်းလုံးဝမထည့်၊ သတင်းစာရောင်းရသည့်ဝင်ငွေဖြင့် ရပ်တည်ခြင်းဖြစ်ကာ အင်တာနက် ဝက်ဘ်ဆိုက်လည်းမထားရှိပေ။
“ ကျွန်မတို့သတင်းစာမှာ ဆောင်ပုဒ်တွေ (motto) ရည်မှန်းချက် (mission) တွေမရှိဘူး။ လူထုကို သတင်းပေးဖို့ပဲ။ ဒါပေမယ့် အချက်အလက်မရှိဘဲနဲ့ လူဘယ်လောက်စိတ်ဝင်စား မယ့်ကိစ္စဖြစ်ပါ စေလုံးဝမရေးဘူး “
နောက်သွားရမယ့်နောက်တစ်နေရာက ပုံနှိပ်မီဒီယာမဟုတ်။ ဝက်ဘ်ဆိုက်ဖြစ်သည့် Slate.fr ဆိုသည့် ဌာနဖြစ်သည်။ ပြင်သစ်မီဒီယာမဟုတ်ဘဲ အမေရိကန်သတင်းစာကြီးဖြစ်သည့် Washington Post သတင်းစာက ပိုင်သည်။ဒီဝက်ဘ်ဆိုက်က အမေရိကန်ပြည်ထောင်စုတွင် အကျော်ကြားဆုံး ဝက်ဘ်ဆိုက်တစ်ခုဖြစ်ပြီး ပြင်သစ်ဘာသာဖြင့် ၂ဝဝ၉ ခုနှစ်မစ၍ ဝက်ဘ်ဆိုက်ပေါ်တင်ခဲ့ကြသည်။ ကြော်ငြာခဝင်ငွေရရှိပြီး အခမဲ့ကြည့်ရှုနိုင် သော ဝက်ဘ်ဆိုက်ဖြစ်သည်။ နေ့စဉ်ဝင်ရောက်ကြည့်ရှုသူ တစ်သိန်းသုံးသောင်းခန့်ရှိပြီး လူချမ်းသာများကိုသာ အဓိကထားသည့်ဝက်ဘ်ဆိုက်ဖြစ် သည်ဟုသိရသည်။
ကျွန်တော်တို့တစ်တွေ မီဒီယာလေ့လာရေးအပြီးအပြန် ဟိုတယ်တွင် ကျွန်တော်တို့ကို အောင်ပွဲခံမုခ်ဦးရှိရာ ရှောင်ဇေလီးဇေး (Champs-Elysee) လမ်းမကြီးကိုလိုက်ပို့ဖို့စောင့်နေသော ကိုမစ်ကီတို့ သုံးယောက်ကိုတွေ့ရသည်။ဟိုတယ်ရှိရာ (rue du Bac) မှတ်တိုင်မှာ အမှတ် ၁၂ ရထား လိုင်းကို လေးဘူတာခန့်စီး၍ ရထားလိုင်းအများစုဆုံရပ်ဖြစ်သည့် Concorde ဘူတာတွင်ဆင်း၊ထိုမှ တစ်ဆင့် အမှတ် ၁ လိုင်းကိုစီးရာ Franklin D. Roosevelt မှတ်တိုင်တွင်ဆင်းလိုက်သည်။ မြေအောက်ဘူတာမှအတက်တွင် ကျော်ကြားလှသော ရှောင်ဇေလီးဇေးလမ်းမကြီးကို မီးရောင် ထိန်ထိန် အောက်တွင်တွေ့လိုက်ရသည်။ ပါရီမြို့၏တည်ဆောက်ပုံကမှတ်ရလွယ်ပါသည်။ပါရီသည် Arrondissement ခေါ် ခရိုင်ကြီး ၂ဝ ဖြင့် ဖွဲ့စည်းထားခြင်းဖြစ်ပြီး L’Hotel de Ville ခေါ် မြို့တော်ခန်းမ မှစ၍ နာရီလက်တံလှည့်သည့်အတိုင်း မြို့အပြင်ကို ၂၊၃၊၄ စသည်ဖြင့် ကျယ်ပြန့်သွားခြင်း ဖြစ်သည်။ မျက်စိထဲမြင်အောင်ပြောရလျှင် ခြင်ဆေးခွေပုံစံအတိုင်းပင်ဖြစ်သည်။ အောင်ပွဲခံမုခ်ဦး တည်ရှိရာမှာ 4 arrandissement တွင် ဖြစ်သည်ဟုထင်ပါသည်။နပိုလီယံတည်ဆောက်ခဲ့သော အောင်ပွဲခံမုခ်ဦးကြီး ကို ချက်စ်နပ်ပင်တွေကြားထဲမှပင် မီးရောင်စုံဖြင့် ခံ့ညားစွာမြင်တွေ့နေရသည်။လမ်းဘေးတစ်ဖက် တစ်ချက်တွင် ကမ္ဘာကျော် Brand ပစ္စည်းများရောင်းချနေသောဆိုင်များ ဖွင့်လှစ်ထားကြသဖြင့် Louis Vuitton ပစ္စည်းရောင်းချသော ကုန်တိုက်ကြီးကိုလည်းမြင်ခဲ့ရသည်။
“ အဲဒီကုန်တိုက်နားရောက်တာနဲ့ တရုတ်တွေက ခင်ဗျားတို့ကို နိုင်ငံခြားသားတွေလားလို့မေးမယ်။ ပြီးရင် ကတ်တလောက်ထဲက သူတို့လိုချင်တဲ့ပစ္စည်းကိုပြပြီး ခင်ဗျားကိုပိုက်ဆံပေးပြီးဝယ်ခိုင်း လိမ့်မယ်။ဝယ်ပေးခတော့ ခင်ဗျားကိုပေးတာပေါ့။ ဒါပေမယ့် မဝယ်ဘဲလစ်ပြေးမယ်တော့မကြံနဲ့။ သူတို့မှာဂိုဏ်းတွေရှိတယ်ဗျ။ သူတို့က အထဲဝင်ဝယ် လို့မရဘူး၊အတုလုပ်မယ့်သူတွေဆိုတာသိနေ တော့ ဆိုင်လုံခြုံရေးတွေက အဝင်မခံဘူး “ ဟု ကိုမစ်ကီကရှင်းပြသည်။Louis Vuitton အိတ်တန်ဖိုး များကတော့ ကျောချမ်းစရာပင်။ မိန်းမကိုင်အိတ်တစ်အိတ်လျှင် အနည်းဆုံး မြန်မာ ငွေသိန်း ၂ဝ ခန့် မှသိန်းရာကျော်ထိရှိသဖြင့် မဝယ်နိုင်မည့်အတူတူမကြည့်ရန် ဆုံးဖြတ်လိုက် သည်။အောင်ပွဲခံမုခ်ဦးနှင့် အနီးဆုံးနေရာရောက်သည်နှင့် ဓာတ်ပုံတွေရိုက်ရန် ပြင်ဆင်ချိန်တွင် ကိုမစ်ကီက အသင့်ပါလာသော ဝီစကီပုလင်းကိုထုတ်၍ အချမ်းပြေသောက် လိုက်ကြသည်။ကျွန်တော်တို့အဖွဲ့ထဲက ကျန်သူများကမူ မသောက်ပါ။ ကျွန်တော်ကတော့ ချမ်းတာကိုအကြောင်းပြုပြီး သောက်လိုက်သည်။ရှောင်ဇေလီဇေး လမ်းမကြီးပေါ်တွင် ကျွန်တော်တို့လိုသောက်သုံးနေသူများကလည်းမနည်း။ကျွန်တော်သည်ရှောင်ဇေလီးဇေးလမ်းမကြီး အောင်ပွဲခံမုခ်ဦး အောက်မှတစ်ဆင့် ဂျာမန်တပ်များ သေနတ်တစ်ချက်မဖောက်ဘဲ ပါရီမြို့သို့ထဲ ဝင်ရောက်လာပုံ၊ မဟာမိတ်အနိုင်ရပြီး ချားလ်ဒီဂေါလ် ဦးဆောင်သော ပြင်သစ်တပ်များ ပြန်လည်ဝင်ရောက်လာပုံကို မှန်းဆမြင်ယောင်ကြည့်မိပါသည်။ ပါရီ၏ညချမ်း သည် ခေါင်းစွပ်၊ လက်အိတ်များမပါသဖြင့် နှာတွေပိတ်သဖြင့် အနီးဆုံးက Mc Donald ဆိုင်တွင် ညစာဝင်စားပြီး ဟိုတယ် သို့ပြန်လာခဲ့ကြသည်။

(ဆက်ရန်)
ပုံ(၁) Le Figaro သတင်းစာတိုက်
ပုံ(၂) ရှောင်ဇေလီးဇေးလမ်းမကြီး

ပါရီ (သို့မဟုတ်) အလင်းမြို့တော် - ၅

ပါရီ (သို့မဟုတ်) အလင်းမြို့တော် - ၅
သူတို့ခေါ်သွားသည့်စားသောက်ဆိုင်ကဘူဖေးပုံစံမျိုးဖြစ်ပြီး မိမိနှစ်သက်ရာဟင်းကို ချက်ချင်းကြော်လှော်ပေးသည်။သောက်စရာမှာ ရေတစ်ပုလင်း တစ်ယူရိုပေးရပြီး ဝိုင်နီကိုမူဘူးထဲမှ ကြိုက်သ လောက်ငှဲ့သောက်နိုင်သည်။စားသောက်ပြီးသောအခါ သူတို့ကကျွန်တော့်ကို အခြားနေရာတွေကို လိုက်ပြပေးချင်သော်လည်း ကျွန်တော်ကနောက်တစ်ပတ်ဆက်နေရဦးမည်ပြောတော့ ဟိုတယ်မှာ စကားပြောကြရန် ကိုစန်းမြင့်၊ ကိုမစ်ကီတို့နှင့်အတူ ဝိုင်တစ်ပုလင်းဝယ်ပြီး ဟိုတယ်ပြန်လာခဲ့ကြသည်။ ဟိုတယ်အခန်းမှာ တစ်နာရီခန့်သာစကားပြောချိန်ရပါသည်။သူတို့ကပါရီမြို့စွန်မှာနေသဖြင့် ည ၁၁ နာရီ အမီပြန်ရမည်ဖြစ်သည်။ရထားတွေကည ၁၁ နာရီကျော်လျှင် ပြေးဆွဲခြင်းမပြုတော့ပေ။
ဟိုတယ်ခန်းမှ သူတို့ထွက်သွားတော့မှ ကျန်တဲ့သူတွေ နောက် ၂ ရက်ပြီးရင် ပြန်မည်ဟုစဉ်းစားမိပြီး နောက်တစ်ပတ် ပါရီတွင်တစ်ယောက်တည်း ငေါင်တောင်တောင် ကျန်ခဲ့မည့် အဖြစ်ကိုတွေးရင်း အိပ်ပျော်သွားသည်။

နောက်တစ်နေ့ AFP သတင်းဌာနသို့ သွားကြည့်ပြီးနောက် FranceTelevision ဌာနသို့ ဆက်လက် ထွက်ခွာခဲ့သည်။ France Television ဌာနအဆောက်အအုံမှာ အတော်ပင် ကြီးမားပြီး အစိုးရပိုင် မီဒီယာဖြစ်ကာ အလုပ်လုပ်နေသူ တစ်သောင်း ကျော်ရှိသည်ဟု ဌာနမှနိုင်ငံ တကာအစီအစဉ်ဆိုင်ရာ ပြောခွင့်ရပုဂ္ဂိုလ် Sean Loup Calazel ကဆိုသည်။France Television သည် အစိုးရပိုင်မီဒီယာဖြစ် သော်လည်း လွတ်လပ်ခွင့်အပြည့်အဝရှိသည်။ရုပ်သံမီဒီယာဖြစ်သည့် အဓိကလိုင်း (Channel) ပေါင်း ၅ လိုင်းရှိပြီး France 2, France 3, France 4, France 5 နှင့် France 0 (Oversea) တို့ဖြစ်ကြသည်။ France 0 မှလွဲ၍ ကျန်လိုင်းများစွာ ပြည်တွင်းတွင် ထုတ်လွှင့်ပြီး France 0 မှာ ပြင်သစ်စကားပြော ကိုလိုနီနိုင်ငံဟောင်းများ (အထူးသဖြင့် အာဖရိကတိုက်) သို့ထုတ်လွှင့်ပေးနေ သည်။ ဌာနအနေဖြင့် ပြင်သစ်နိုင်ငံနေ လူများ၏ တီဗီလိုင်စင်ကြေးနှင့် ကြော်ငြာများမှ ဝင်ငွေရရှိပြီး တီဗီတစ်လုံးလျှင် လိုင်စင်ကြေး တစ်နှစ် ၁၂၅ ယူရိုကို အစိုးရသို့ပေးဆောင်ရကာ လိုင်းပေါင်း ၁၉လိုင်း ကြည့်ရှုနိုင် ပေသည်။ အဆိုပါလိုင်စင်ကြေးမှာ ဥရောပနိုင်ငံများထဲတွင် အနည်းဆုံးကောက်ခံသောနှုန်း ဖြစ်ပြီး ၂ဝ၁၃ ခုနှစ်မှစ၍ ၁၃၁ ယူရိုအထိ တိုးကောက်ရန်စီစဉ်ထားကြောင်း၊ ဌာန၏ဝင်ငွေမှာတစ်နှစ် လျှင် ယူရို ၃ ဘီလီယံရှိပြီး သုံးပုံနှစ်ပုံမှာ အခပေးလိုင်းများမှရရှိကာ ကျန်တစ်ပုံမှာ ကြော်ငြာများမှရရှိ ခြင်းဖြစ်ကြောင်း Mr. Calazel က ရှင်းပြသည်။
မီဒီယာဌာန၏ ဥက္ကဋ္ဌကို ရွေးကောက်ပုံကလည်း စိတ်ဝင်စားဖို့ကောင်းသည်။ ယခင်က CSA (Conseille Superior de L'Audiovisuel) မှ ရွေးချယ်သော်လည်း ၂ဝဝ၉ ခုနှစ် သမ္မတဆာကိုဇီ လက်ထက်မှစ၍ သမ္မတမှတိုက်ရိုက်ရွေးချယ်ခဲ့သည်။ သို့ဖြစ်၍ ၂ဝ၁၃ ခုနှစ်မှစ၍ CSA သို့မဟုတ် သမ္မတက တိုက်ရိုက်ရွေးချယ်ခြင်းပြု/မပြုကို ပါလီမန်အတွင်းဥပဒေပြုဆုံးဖြတ်မည်ဟုသိရသည်။
Le Monde သတင်းစာတိုက်ရောက်တော့ ညနေ ၅ နာရီထိုးနေပြီဖြစ်သည်။Le Monde ဆိုသည် မှာ အင်္ဂလိပ်ဘာသာဖြင့် (The People) ဟု အဓိပ္ပာယ်ရသည်။ အဆောက်အအုံကြီး၏ ဧည့်ကြိုခန်းမတွင် ပထမဆုံး သတင်းစာထုတ်သည့်နှစ် ၁၉၄၄ က ရိုက်နှိပ်ထုတ်ဝေခဲ့သော ပုံနှိပ် စက်ကြီးကိုပြထားသည်။ ကျွန်တော်တို့ကို ကြိုဆိုသည့်သူက သူ့ကိုယ်သူမိတ်ဆက်ပေးသော်လည်း နာမည်မမှတ်မိတော့ပါ။ ကျွန်တော်တို့ ရောက်သည့်အချိန်တွင် သတင်းထောက်များပြန်သွားပြီဖြစ် သည့်အတွက် Website တင်နေသူ ၁ဝ ယောက် ခန့်ကိုသာတွေ့ခဲ့ရသည်။ နေ့စဉ်ထုတ်ညနေပိုင်းသတင်းစာကြီးဖြစ်ပြီး ၂ဝဝ၉ ခုနှစ်မှစ၍ ပျမ်းမျှ နေ့စဉ်စောင်ရေ ၃ သိန်းကျော် ထုတ်ဝေနေသည့် သတင်းစာဖြစ်သည်။ Le Monde သတင်းစာသည် ပြင်သစ်ဘာသာဖြင့်ထုတ်ဝေ သော နာမည်ကြီးသတင်းစာတစ်ခုဖြစ်ပြီး အခြားတစ်ခုမှာ Le Figaro ပညာတတ်လူတန်းစား ပရိသတ်ကို အဓိကထားထုတ်ဝေခြင်းဖြစ်သည်။
' နေ့စဉ်ထုတ် သတင်းစာအပြင် လစဉ်ထုတ် Le Monde မဂ္ဂဇင်းလည်းရှိပါတယ်။ Website ကိုတော့ နေ့စဉ်ပရိသတ် ၁ သန်းလောက် ဝင်ကြည့်ကြပြီး Update ကိုတော့ မနက် ၆ နာရီနဲ့ ည ၁၁ နာရီ နှစ်ခါ လုပ်ပေးပါတယ်။ Website က အခပေးကြည့် ရတဲ့ Website ပါ။ Le Monde ရဲ့ ဝင်ငွေက တော့ ပုံနှိပ်မီဒီယာက ၆ဝ ရာခိုင်နှုန်းရပြီး Website ကနေ ၄ဝ ရာခိုင်နှုန်းရပါတယ် 'ဟု အဆိုပါပုဂ္ဂိုလ် ကရှင်းပြသည်။
အပြန်တွင် ဟိုတယ်မပြန်ချင်သေးသဖြင့် ဟိုတယ်နှင့်မဝေးလှသော LaoZu တရုတ် စားသောက် ဆိုင်မှာဆင်းနေခဲ့ကြသည်။လောက်ဇူစားသောက် ဆိုင်မှာ ၁၉ လမ်းကတိုက်ခန်းများ လောက်သာ ကျယ်ပြီး အပေါ်ထပ်တွင် ထပ်ခိုးလေးရှိသည်။ပါရီစားသောက်ဆိုင်များတွင်ရှိသော စားပွဲအကျယ် အဝန်းမှာ မြန်မာနိုင်ငံကလက်ဖက်ရည်ဆိုင်စားပွဲ၏ သုံးပုံတစ်ပုံသာရှိပြီး စားရသည်မှာကျဉ်းကျပ် လှသည်။ တစ်ဝိုင်းနှင့်တစ်ဝိုင်းကလည်း ကပ်ရက်၊ သူ့အင်္ကျီနှင့်ကိုယ့်အင်္ကျီ ထိကပ်နေသည့်အထိ နီးကပ်လှသည်။ အမှန်က ဟိုတစ်နေ့ကတည်းက ဒီဆိုင်မှာ စားသုံးရန် လာခဲ့ကြသေးသည်။ သို့သော် စားပွဲအတွက် နောက်တစ်နာရီမှရမည်ဆိုသဖြင့် ပြန်လှည့်ခဲ့ကြခြင်း ဖြစ်သည်။စားသောက်ဆိုင်များ ကျဉ်းသဖြင့် စားပွဲကို တစ်နာရီလောက် ကြိုတင်မှာကြားထားရ လေ့ရှိသည်။ဆိုင်ရှိစားပွဲထိုးများမှာ ပြည်မကြီးမှမဟုတ်ဘဲ ဗီယက်နမ်နွယ်ဖွား တရုတ်မလေး တွေဖြစ်သည်။ အစားအသောက်များမှာ တရုတ်စာဖြစ်၍ ကျွန်တော်တို့ခံတွင်း တွေ့သော်လည်း ဈေးမှာအတန်ငယ်ကြီးသည်ဟုဆိုရပါမည်။ ထမင်းကြော်တစ်ပွဲ၊ တုမ်ယမ်းဟင်းချို ၂ ပွဲ၊ ဘဲပေါင်းတစ်ပွဲ၊ တို့ဖူးဟင်းတစ်ပွဲ၊ ဝက်သားပေါင်းနှင့် ထမင်းလေးလုံးမှာစားရာ ယူရို ၈ဝ ကျော်ကျသင့်သည်။ ဟင်းချိုပန်းကန်လုံးအသေးဖြင့် ထမင်း တစ်လုံးပင် နှစ်ယူရို ကျသင့်နေပြီဖြစ်သည်။
ထမင်းစားပြီးဟိုတယ်ရှိရာသို့ စိန့်ဂျာမိန်းလမ်းမကြီးတစ်လျှောက် လမ်းလျှောက်ပြန်ခဲ့ကြရာ ကဖေးဆိုင် များမှာ လူတွေပြည့်နေကြသည်။ကဖေးဆိုင်လေးများ၏ ပလက်ဖောင်းပေါ်ထွက်နေသော အမိုးများ အောက်တွင် ထိုင်ခုံများချထားပြီး ဘေးပတ်လည်ကို အအေးမဝင်အောင် ပလတ်စတစ် အကြည်စများ ကာထားသည်။အပြင်မှာဘယ်လောက်ချမ်းချမ်း ပလတ်စတစ်ဖယ်ပြီး စားပွဲပေါ်ထိုင် လိုက်လျှင်တော့ အပူဓာတ်ပေးမီးချောင်းများ (Heater Lighting) ထွန်းထားသောကြောင့် နွေးထွေး နေပါသည်။ ကျန်သူများက ဟိုတယ်ပြန်သွားသော်လည်း ကျွန်တော်ကတော့ ပါရီကကဖေး ဆိုင်ထိုင်ဖူးချင်သော ကြောင့် ကော်ဖီတစ်ခွက်ဝင်သောက်လိုက်သည်။ စားပွဲထိုးအမျိုးသမီးက ကော်ဖီ အမည်း တစ်ခွက်နှင့် အညိုရောင်သကြားခဲများ လာချပေးပါသည်။ပြင်သစ်လူမျိုးများသည် ကော်ဖီအပြင်း အတော်သောက် သူများဖြစ်ပါသည်။အကြမ်းပန်းကန်လုံး လောက်သာရှိသောကော်ဖီကို တစ်ဝက်ကုန်အောင်မနည်း သောက်ယူရပါသည်။ရင်တွေတုန်လာသဖြင့် ကျန်တစ်ဝက်ကိုချန်ခဲ့ပြီး တစ်ခွက်လုံးသာသောက်လိုက် လျှင် ညတော့အိပ်ပျော်မည်မဟုတ်ပါ။
ဟိုတယ်ပြန်ရောက်တော့ ဧည့်ကြိုကောင်တာမှ ကျွန်တော်အတွက်အထုပ်တစ်ထုပ် ရောက်နေ ကြောင်းပြောသဖြင့် ဖွင့်ကြည့်လိုက်ရာ ကိုဥာဏ်ဝင်းကလက်ကိုင်ဖုန်း ပေးထားခြင်းဖြစ်ကြောင်းတွေ့ ရသည်။ကျွန်တော်တို့တွင် လက်ကိုင်ဖုန်းများပါသော်လည်းဘာကြောင့်မှန်းမသိ ပါရီတွင်သုံးမရပါ။ ထို့အတွက် လိုအပ်ပါက ဆက်သွယ်နိုင်ရန် ကိုဥာဏ်ဝင်းက ဖုန်းလာပေးထားခြင်းဖြစ်သည်။ဖုန်းရပြီ ဆိုတော့ ဆက်သွယ်ရမည့် ပြင်သစ်မိတ်ဆွေများ၏ ဖုန်းနံပါတ်များကို ကျွန်တော့်အီးမေးလ်ထဲတွင် လိုက်ရှာပြီး စာရင်းပြုစု ထားနေမိသည်။နောက် ၂ ရက်ပြီးတွင် ကျန်သူများမြန်မာနိုင်ငံပြန်တော့မည် ဖြစ်ပြီး ကျွန်တော်တစ် ယောက်တည်းသာကျန်ခဲ့တော့မည်ဖြစ်သဖြင့် ပါရီတွင်ယောင်လည်လည် မဖြစ်စေရန် မိတ်ဆွေ သူငယ်ချင်းများ၏ ဖုန်းနံပါတ်များကို လိုက်မှတ်နေရခြင်းဖြစ်ပါသည်။
သြော် ဘာလိုလိုနဲ့ပါရီရောက်တာ ၅ ရက်ပြည့်သွားပါပြီလား။
(ဆက်ရန်)
ပုံ(၁) ပါရီလမ်းဘေး စာအုပ်ဆိုင်လေး
ပုံ(၂) ပါရီက မဟာကဖေးဆိုင်များ